Diversi familji li jgħixu qrib sit ta’ żvilupp fin-Naxxar ġew evakwati nhar il-Ħamis filgħaxija wara li parti mill-pedamenti ta’ bini taħt kostruzzjoni ċediet.
L-Awtorità għall-Bini u l-Kostruzzjoni (BCA) ħarġet ordni immedjata biex jieqaf kull xogħol fuq is-sit u qalet li l-evakwazzjonijiet saru bħala miżura “prekawzjonarja”.
Fi stqarrija, il-BCA qalet li għaddejjin investigazzjonijiet fuq is-sit biex jiġi determinat x’għandu jsir filwaqt li qed taħdem flimkien mad-Dipartiment tal-Protezzjoni Ċivili.
Residenti li jgħixu qrib iż-żona, li qabel kienet barriera, irrappurtaw kollass parzjali ta’ ħajt ta’ sostenn dejjaq.
Ritratti miż-żona juru ħitan dojoq li kienu qed isostnu struttura ferm itqal mibnija fuqhom hekk kif din kienet qed tgħaqqad spazju fil-barriera.
Wieħed minn dawn il-ħitan ċeda, u dan qajjem mistoqsijiet dwar jekk il-ħitan kinux iddisinjati b’mod adegwat biex isostnu l-piż tal-kostruzzjoni fuqhom.
Il-binja involuta għadha taħt kostruzzjoni u tifforma parti minn żvilupp kbir qrib l-ex Trade Fair Grounds tan-Naxxar, li qed jiġi żviluppat minn Anton Camilleri, magħruf bħala “Il-Franċiż”.
F’kummenti lill-midja, Camilleri sostna li r-residenti ma kinux fil-periklu u qal li l-eqreb binjiet residenzjali jinsabu madwar 100 metru ’l bogħod mis-sit fejn seħħ l-inċident.
Il-familji evacuati minn binjiet fil-qrib qattgħu l-lejl f’lukanda waqt li l-awtoritajiet qed iwettqu risk assessment taż-żona.
L-investigazzjonijiet għadhom għaddejjin.
