Moviment Graffitti ikkundanna lill-Planning Authority u lill-gvern għal dak li sejjaħ deċiżjoni “tal-mistħija” u “imbarazzanti” biex jiġu sanzjonati 20 padel court mibnija illegalment fuq Manoel Island.
Fi stqarrija maħruġa nhar il-Ġimgħa, l-NGO qalet li r-rakkomandazzjoni tal-Awtorità tal-Ippjanar tinkludi wkoll għaxar padel courts oħra fuq żona li fiha fdalijiet arkeoloġiċi ta’ valur.
Moviment Graffitti appellat lill-Prim Ministru Robert Abela u lill-Ministru tal-Ippjanar Clint Camilleri biex “jirranġaw il-ħsara” li qed issir lis-sit u lir-reputazzjoni tal-gvern billi jonoraw il-wegħda li Manoel Island tingħata lura bħala park għall-poplu.
L-għaqda osservat li r-rakkomandazzjoni saret fi żmien rekord u “suspettuż”, jumejn biss wara li għalqet il-perjodu tal-oġġezzjonijiet pubbliċi li fih ġew sottomessi 186 oġġezzjoni.
Skont l-NGO, dan imur kontra l-viżjoni li l-gvern stess kien wiegħed għal Manoel Island bħala park nazzjonali.
Moviment Graffitti qalet li l-padel courts qed jiġu żviluppati min-negozjant Sharlon Pace, li huwa wkoll president tal-klabb tal-futbol ta’ Gżira.
L-għaqda sostniet li Pace ammetta li għandu “interessi kummerċjali personali” fil-proġett tal-padel courts, fatt li skontha jmur kontra r-responsabbiltà tiegħu lejn il-komunità sportiva ta’ Gżira.
L-NGO qalet ukoll li Pace mistenni jħallas biss madwar €900 għal xogħlijiet li allegatament koprew b’konkos żona ta’ wirt kulturali Malti.
Skont Moviment Graffitti, fis-sit hemm diversi fdalijiet arkeoloġiċi dokumentati li jmorru lura għall-perjodu klassiku u li huma fost l-eqdem evidenza ta’ attività umana fiż-żona.
L-għaqda kkritikat ukoll lis-Superintendence of Cultural Heritage, fejn sostniet li minkejja li kienet taf bix-xogħlijiet illegali, ma dehritx imħassba dwar il-każ.
Moviment Graffitti irreferiet ukoll għal kummenti preċedenti tal-Prim Ministru Robert Abela, li kien qal li l-viżjoni tal-gvern għal Manoel Island hija allinjata mal-kampanja Manoel Island: Post Għalina u l-petizzjoni li ġabret kważi 30,000 firma.
“Madankollu, l-azzjonijiet tal-awtoritajiet qed idoqqu melodi differenti,” qalet l-għaqda.
Il-kampanja Manoel Island: Post Għalina reġgħet sostniet l-appoġġ tagħha biex il-komunità tal-futbol ta’ Gżira tingħata spazju adegwat għall-attivitajiet tagħha, iżda insistiet li dan għandu jsir bħala parti minn pjan usa’ għal Manoel Island.
Skont il-kampanja, kumpless kummerċjali tal-padel mhuwiex il-ground tal-futbol li l-komunità ta’ Gżira ilha titlob u lanqas ma huwa kompatibbli mal-viżjoni proposta għall-gżira.
