Il-partit Momentum ippropona politika ġdida msejħa ‘Safety First’, li titlob l-implimentazzjoni immedjata ta’ Att Nazzjonali dwar is-Sigurtà tan-Nar għall-postijiet pubbliċi, fid-dawl ta’ nirien li faqqgħu f’resort tal-iskijjar fl-Iżvizzera lejlet l-Ewwel tas-Sena.
Is-Segretarju Ġenerali ta’ Momentum, Mark Camilleri Gambin, qal li ż-żgħażagħ huma mimlijin pjanijiet, tamiet u ħolm, u għalhekk jistħoqqilhom ambjenti fejn jistgħu jgawdu l-ħajja mingħajr perikli moħbija. Huwa saħaq li s-sigurtà trid tkun prijorità u mhux xi ħaġa li tiġi indirizzata biss wara traġedja.
Momentum żied li l-Gvern m’għandux jistenna li jseħħ diżastru lokali biex jistabbilixxi l-istandards tiegħu, iżda għandu jibdel l-approċċ minn wieħed reattiv għal wieħed ta’ prevenzjoni. Skont il-partit, dan ifisser li l-enfasi għandha tkun fuq miżuri konkreti li jipprevjenu l-inċidenti milli jseħħu, aktar milli fuq investigazzjonijiet wara l-fatt.
Il-proposta tinkludi verifiki rigorużi fuq il-postijiet kollha ta’ divertiment li jiġbru ammonti kbar ta’ nies, kif ukoll obbligu li s-sistemi tal-awdjo jkunu marbuta mas-sistemi tal-allarm tan-nar sabiex il-mużika tieqaf immedjatament f’każ ta’ emerġenza. Momentum qed jipproponi wkoll projbizzjoni fuq l-użu ta’ sparkles jew effetti viżivi tan-nar f’postijiet magħluqa li mhumiex iddisinjati apposta għalihom.
Miżura oħra proposta hija spezzjonijiet biex jiġi rregolat in-numru ta’ nies preżenti fil-postijiet ta’ divertiment, bil-għan li jiġu evitati sitwazzjonijiet ta’ paniku. Barra minn hekk, il-partit qed jappella għal programm nazzjonali ta’ edukazzjoni li jgħin liż-żgħażagħ jagħrfu r-riskji, inkluż kif jiċċekkjaw l-eżistenza ta’ ħruġ ta’ emerġenza u tagħmir tas-sigurtà.
Momentum irrefera wkoll għal kuntesti lokali, fosthom il-każ tal-2015 f’Paceville meta waqgħet balavostru u għexieren ta’ żgħażagħ spiċċaw imweġġa’.Il-Qorti kienet ikkonkludiet li waħda mir-raġunijiet ewlenin għal dawk il-ġrieħi kienet in-nuqqas ta’ proċeduri adegwati ta’ evakwazzjoni.
“Mill-użu ta’ piroteknika fuq ġewwa għall-‘atmosfera’, sal-inċertezza dwar il-materjali tal-kostruzzjoni, qed niddependu aktar fuq ix-xorti milli fuq il-loġika,” qal il-partit fi stqarrija. “Billi ngħollu l-istandards tagħna issa, qed nipproteġu mhux biss il-ħajjiet, iżda wkoll il-ferħ u l-libertà taż-żgħażagħ tagħna.”
.jpg)
