L-Awtorità għas-Saħħa u s-Sigurtà fuq il-Post tax-Xogħol nediet kampanja ġdida biex tqajjem aktar għarfien dwar is-saħħa mentali fuq il-post tax-xogħol.
Il-kampanja tnediet waqt żjara fl-Ajruport Internazzjonali ta’ Malta, fejn il-Ministru għall-Infrastruttura Jonathan Attard u l-Kap Eżekuttiv tal-OHSA Josianne Cutajar iltaqgħu mal-Kap Eżekuttiv tal-MIA Alan Borg u ċ-Chairman tal-OHSA Pierre Fava.
Waqt iż-żjara ġew diskussi l-prattiċi ta’ saħħa u sigurtà fuq il-post tax-xogħol fl-ajruport, b’Attard jindika lill-MIA bħala eżempju ta’ prattika tajba fl-integrazzjoni tas-saħħa mentali mal-miżuri tas-saħħa u s-sigurtà.
Il-Ministeru qal li l-kampanja se tiffoka fuq l-identifikazzjoni u t-tnaqqis ta’ riskji psikosoċjali fuq il-post tax-xogħol.
Fost dawn hemm piż tax-xogħol eċċessiv, sigħat twal, komunikazzjoni dgħajfa, bullying u fastidju.
Il-Ministeru fakkar li f’Ottubru 2025 l-OHSA waqqfet Psychology Unit apposta.
Din l-unità twettaq riċerka, tassisti fl-iżvilupp tal-politika, tappoġġja lill-uffiċjali tekniċi waqt spezzjonijiet fuq il-postijiet tax-xogħol u tgħin lill-Awtorità meta jkunu meħtieġa passi ta’ infurzar minħabba ksur ta’ obbligi legali.
Bħala parti mill-aspett edukattiv tal-kampanja, l-OHSA ngħaqdet mar-Richmond Foundation biex toffri żewġ korsijiet ta’ taħriġ b’xejn.
Dawn huma Mental Health First Aid in the Workplace u Prevention of Psychosocial Risks.
Skont il-Ministeru, il-korsijiet huma mmirati lejn min iħaddem, professjonisti tar-riżorsi umani, managers u ħaddiema.
L-għan huwa li jgħinuhom jagħrfu sinjali ta’ diffikultà psikoloġika u jiggwidaw lill-persuni affettwati lejn għajnuna professjonali.
.png)
.png)
