Il-Ministru għall-Affarijiet Barranin Chris Fearne qal li Spanja u l-Marokk qed jikkoordinaw l-isforzi tagħhom biex jirritornaw il-migranti li daħlu b'mod irregolari fl-enklava Spanjola ta' Ceuta.
F'post fuq X, Fearne qal li tkellem mal-Ministru għall-Affarijiet Barranin Spanjol José Manuel Albares dwar is-sitwazzjoni f'Ceuta.
Skont Fearne, Albares assigurah li hemm "koordinazzjoni sħiħa mal-awtoritajiet Marokkini" fir-ripatrijazzjoni tal-migranti irregolari u kkonferma li sat-2pm nofs dawk li kienu daħlu f'Ceuta kienu diġà ntbagħtu lura lejn il-Marokk.
Fearne qal li l-iżviluppi "għal darb'oħra jenfasizzaw is-sinifikat tal-protezzjoni tal-fruntieri esterni tal-Unjoni Ewropea".
Madwar 60,000 migrant daħlu f'Ceuta mill-Marokk fi żmien 24 siegħa, f'waħda mill-akbar mewġiet ta' migrazzjoni li laqtet il-fruntiera tan-Nofsinhar tal-Ewropa f'dawn l-aħħar snin.
Skont il-President ta' Ceuta, mill-inqas 34 persuna mietu waqt il-qsim.
L-influss seħħ wara deċiżjoni tal-Qorti Suprema Spanjola li stabbiliet li migranti interċettati fuq il-baħar waqt li jippruvaw jaslu f'Ceuta jew Melilla ma jistgħux jintbagħtu lura immedjatament lejn il-Marokk.
Il-Prim Ministru Spanjol Pedro Sánchez iddeskriva s-sitwazzjoni bħala "attakk" u qal li l-migranti kollha li daħlu illegalment se jintbagħtu lura lejn il-Marokk "malajr kemm jista' jkun".
Sadanittant, Madrid bagħtet membri tal-forzi armati biex isaħħu s-sigurtà f'Ceuta u Melilla, fejn matul il-lejl ġew irrappurtati wkoll bejn 300 u 400 qsim ieħor tal-fruntiera.
Ceuta u Melilla, li jinsabu fit-Tramuntana tal-Marokk iżda huma taħt il-kontroll ta' Spanja, jirrappreżentaw l-unika fruntiera fuq l-art bejn l-Unjoni Ewropea u l-Afrika u ilhom għal snin twal fost il-punti ewlenin ta' dħul għall-migranti li jfittxu li jidħlu fl-Ewropa.
