Il-President Amerikan Donald Trump akkuża lill-Għaqda Dinjija għas-Saħħa li fi kliemu “falliet id-dover bażiku tagħha,” fi żmien il-pandemija u għalhekk ħabbar li se jkun qed iwaqqaf il-finanzjament tagħha.
Trump akkuża lill-Ġnus Magħquda li kienet qed tgħatti l-imxija tal-virus meta dan feġġ għall-ewwel darba fiċ-Ċina u fi kliemu din għandha tinżamm responsabbli.
Il-President Amerikan qal dan fi żmien li qed jirċievi kritika qawwija għal kif l-Istati Uniti mxiet f’din il-pandemija, hekk kif fl-Amerka kien hemm l-akbar ammont ta’ każijiet, aktar mill-Italja, Spanja u ċ-Ċina.
Pajjiżi Ewropew ikomplu jerħu r-restrizzjonijiet
Intant, diversi pajjiżi Ewropej komplew jerħu r-restrizzjonijiet tal-lockdown.
L-Italja ħabbret li se tkun qed tippermetti xi ħwienet biex jerġgħu jiftħu, inkluż ħwienet tal-kotba u anke stationaries.
Aktar kmieni din il-ġimgħa, diversi Spanjoli rritornaw lura għax-xogħol hekk kif l-industriji “essenzjali” reġgħu bdew joperaw.
Id-Danimarka, li kien l-ewwel pajjiż Ewropew li għalaq il-fruntieri u anke ħabbar lockdown, se jkun qed jiftaħ mill-ġdid l-iskejjel u anke ċ-ċentri ta’ matul il-jum għall-anzjani.
Dan fid-dawl tal-fatt li l-Kummissjoni Ewropea mistennija tħabbar roadmap dwar kif għandhom jitneħħew ċertu restrizzjonijiet ta’ konteniment li ttieħdu mill-Istati Membri.
Franza
Mill-banda l-oħra, l-imwiet fi Franza qabżu l-15,000 hekk kif il-pajjiż għandu ‘l fuq minn 100,000 każ.
Il-President Franċiż, Emmanuel Macron, ħabbar li l-lockdown se jkun estiż sal-11 ta’ Mejju.
