Kollu wirt

Beppe Fenech Adami f’maratona ta’ appelli biex Joseph Muscat jirriżenja minn Prim Ministru

Beppe Fenech Adami
Beppe Fenech Adami

Kull Gvern jiret lil dak li kien hemm qablu. Fil-fatt ħafna mill-kontroversji u problemi li għandu dan il-Gvern ġejjin minn żmien l-ieħor. Mhix kwistjoni li nsemmu dak li għadda iżda dak li għadu. Jekk huwa trasport pubbliku, jekk huwa Sptar Mater Dei, jekk hija il-kwistjoni tal-enerġija u tal-fuel, dawn kollha huma problemi “brought forward”, f’termini ta’ “accountancy” politiku, li kellu u għadu jrid jseffaq wiċċu magħhom dan il-Gvern.

Anke l-kontroversja tal-Cafè Premier hija parti minn dan il-wirt. Il-kwistjoni nibtet u kibbret taħt l-amministrazzjoni l-oħra. Post mill-aktar ċentrali u storiku kien magħluq u destinat li jibqa’ magħluq għal snin sħaħ mingħajr ma jista’ jkun użat bl-aħjar mod possibbli. Fi żmien meta l-Belt Valletta għandha tkun il-Belt Kapitali tal-Ewropa, post ta’ valur tremend kien se jibqa’ magħluq.

Il-Gvern kellu żewġ għażliet. Jew li jagħmel kawża biex jieħdu lura billi jxolji ċ-ċens li għad fadallu snin twal jew li jsib l-iqsar triq possibbli biex kemm jista’ jkun malajr dan il-post jirritorna lura għand il-poplu. M’hemm ebda dubju li s-sidien ma kinux qegħdin joqogħdu għall-obbligi tagħhom għall-kuntratt. Xi ħaġa bilfors kellha ssir.

Iżda kawża bħal din bl-appell b’kollox, tajjeb jew ħażin, kienet tieħu snin biex tinqata’ u b’dubji serji dwar kemm jistgħu jinġabru d-danni mingħand is-sidien. Kieku dan il-Gvern għażel din it-triq dan il-post kien jispiċċa f’rovina. Għandna l-eżempju tal-White Rocks, li minħabba t-tul u l-indeċiżjoni tal-Gvern spiċċa f’rovina totali u kannibalizzat.

Bl-onestà kollha ma nemminx li din kienet l-aħjar triq. It-triq li tiftihem mas-siden biex neħduh lura kien l-unika għażla, xejn xejn minn dak li tħallas virtwalment lis-sidien, mar biex qata’ parti kbira tad-djun li kellhom lis-sidien f’taxxi u ħlasijiet oħra lill-Gvern. Inħossni urtat u mweġġa’ li l-Gvern f’ċirkostanzi bħal dawn, ikollu jħallas, anke jekk ma jkunx ħlas mistħoqq, biex jevita li jnaqqas mid-danni li sofra. Hekk ġara fil-każ tal-Cafè Premiere.

Iżda kull każ għandu warajh il-morali tal-istorja li jkun wassal għalih. L-ewwel tagħlima f’din l-istorja hi din: li s-suċċess tal-għażla ta’ offrenti fejn si tratta ta’ propjetà pubblika hija li jintgħażel tassew l-aħjar offerent. Meta ngħid l-aħjar ma jfissirx li min joffri l-aktar, iżda min tassew ikun lest joqgħod għall-obbligazzjonijiet kollha tiegħu. Min ma jasalx biex joqgħod għal dawn l-obbligazzjonijiet m’għandux jitħalla jerġa’ jittanta jidħol għall-kuntratti pubbliċi ta’ din ix-xorta.

It-tieni tagħlima hi, li mnalla hemm l-Awditur Ġenerali. Jiena dejjem kelli rispett illimitat għal din l-istituzzjoni għaliex kif irnexxielha tipprova, kemm taħt din l-Amminstrazzjoni u kif ukoll taħt l-oħra, dejjem uriet li m’għandha minn ħadd. Għalhekk għamel sewwa l-Gvern mill-ewwel iddikjara li se jistudja sewwa dan ir-rapport u janalizza l-miżuri li jistgħu jkun introdotti jew proposti mill-Awditur Ġenerali.

Fil-fatt tispikka d-differenza bejn kif dan il-Gvern laqa’ dan ir-rapport ma’ dak li kien jiġri qabel. Kull meta qabel L-Awditur Ġenerali kien jiċċensura l-mod kif kienu jsiru l-affarijiet kienu jaraw x’jgħidu biex ixajtnuh. Ma ninsa qatt lil Austin Gatt f’żewġ okkażjonijiet ma joqgħodx għal kritika ta’ din l-istituzzjoni. Fil-każ tal-Voice Of The Mediterranean bilkemm ma riedx jordna l-arrest tiegħu. Fil-każ tal-BWSC prova jwaqqa’ għaċ-ċajt lill-istess istituzzjoni li kienet qalet li jkun aħjar li toħroġ tender oħra.

Huwa minnu li kull Gvern jiret lil dak ta’ qablu. Iżda l-importanti li ma jintiritx l-attitudni li kellhom dawk li sa ftit ilu kienu fil-Gvern. Bħal meta kissru lill-Awditur tal-MEPA biex baqgħu sakemm baqgħu biex neħħewh. L-istess kienu għamlu lill-Perit Carmel Caccopardo li kien jassisti lil dan l-Awditur.

Bħal meta provaw ikissru lill-Maġistrat Consuelo Scerri Herrera wara li kixfet l-abbużi li kienu jsiru fil-Fondazzjoni għall-iskejjel ta’ għada. Bħal meta provaw ikissru lill-Ombudsman meta kixef l-abbużi politiċi li kienu jsiru fl-Armata u fl-Air Malta. Nittama li ma nirtux din l-attitudni li nħallu lill-istituzzjonijiet joperaw bil-libertà u s-serenità kollha tagħhom bħalma ġara fil-każ tal-Cafè Premiere.

Però l-aktar li nsib komika, hija l-maratona ta’ Beppe Fenech Adami, Viċi Kap tal-PN għall-Affarijiet tal-Partit, li ma jiqafx mill-maratoni ta’ appelli f’kull ħaġa u f’kollox, biex Joseph Muscat jirriżenja minn Prim Ministru. Hija ħasra, kif mhux qiegħed jinduna li ħadd mhu jieħdu aktar bis-serjetà għaliex anke jekk ma jorqodx bl-inbiegħ tal-kelb tal-ġar, żgur b’xi mod se iġebbidha biex sal-punt li jitlob ir-rizenja ta’ Joseph Muscat minn Prim Ministru. Il-kelma riżenja issa qiegħda f’ħalqhom, meta sa ftit ilu tant kien hemm affarijiet serji fejn persuni eċċellenti kellhom jirreżenjaw, iżda kienu nesew kif tippronunzjaha aħseb u ara kemm jitolbuha. L-aktar każ klassiku kienet iż-żieda fl-onorarja tal-membri tal-kabinett li dakinhar kienet deskritta mill-Awditur Ġenerali bħala eżempju ċar ta’ kif m’għandekx tamministra pajjiż. Jekk kien hemm lok għal riżenja żgur li kienet dakinhar, iżda l-pajjiż ma setax jgħaddi mingħajr kabinett sħiħ!

Jien ma kelli ebda dubju li dan il-każ se jiżvilluppa f’polverista politika. Iżda jekk tisplodi ma nafx lil min eżattament se ttajjar, jekk hux lill-Oppożizzjoni li trid akkost ta’ kollox tkun fil-poter jew lil Gvern li ta widen għal dak li qal l-Awditur Ġenerali. Nistennew u naraw. 

More in Il-punt