Membri tal-aġenziji tal-infurzar tal-liġi f’Malta reġgħu ngħaqdu flimkien biex jiġbru u jqassmu ikel lil gruppi vulnerabbli, bħala parti minn inizjattiva ta’ solidarjetà li issa waslet fis-sitt sena tagħha.
L-inizjattiva rat ħaddiema mill-forzi dixxiplinati jiġbru provvisti ta’ ikel u jqassmuhom lil diversi djar residenzjali u ċentri ta’ appoġġ madwar Malta. Il-Ministru għall-Intern, is-Sigurtà u x-Xogħol, Byron Camilleri, ingħaqad mal-uffiċjali waqt id-distribuzzjoni.
Din l-inizjattiva hija organizzata permezz ta’ kollaborazzjoni bejn diversi entitajiet fi ħdan il-Ministeru għall-Intern u għandha l-għan li tappoġġja lil dawk l-aktar fil-bżonn, filwaqt li tippromwovi valuri ta’ solidarjetà, ġenerożità u responsabbiltà soċjali.
Fost il-benefiċjarji kien hemm djar għat-tfal, ċentri li jgħinu vittmi ta’ vjolenza domestika bħad-Dar Milja u d-Dar Sagra Familja, is-Sorijiet fid-Dar San Ġużepp f’Ħaż Żabbar u s-Sorijiet Ursulini f’Pietà. Ingħatat ukoll assistenza lill-Peace Lab f’Ħal Far, immexxi minn Dun Dionisju Mintoff.
Il-Ministru Camilleri faħħar l-inizjattiva u rringrazzja lil dawk kollha involuti, u qal li din tmur lil hinn mid-doveri ta’ kuljum tal-forzi tal-ordni. Huwa ddeskriva l-inizjattiva bħala xhieda ċara tal-kompassjoni u s-sens ta’ solidarjetà li juru l-irġiel u n-nisa li jaqdu fil-forzi dixxiplinati, mhux biss fis-salvagwardja tas-sigurtà tal-pajjiż iżda wkoll fil-ħarsien tad-dinjità u l-benesseri ta’ persuni vulnerabbli.
Il-ministru żied jgħid li dawn il-ġesti jsaħħu r-rwol tal-forzi bħala parti integrali mill-komunità, billi jħaddnu l-valuri umani li fuqhom hija mibnija s-soċjetà Maltija.
Il-ministeru esprima wkoll l-apprezzament tiegħu lejn dawk kollha li kkontribwixxew għall-ġbir tal-ikel, kif ukoll lejn l-amministraturi tad-djar residenzjali għall-ħidma kontinwa tagħhom, u enfasizza l-importanza li inizjattivi bħal dawn ikomplu jsiru sena wara sena.
