Żgħażagħ sa 30 sena se jkunu jistgħu jċedu l-liċenzja tas-sewqan tagħhom għal perjodu ta’ ħames snin bi skambju ta’ €25,000, taħt skema ġdida tal-Gvern li se tidħol fis-seħħ mill-1 ta’ Jannar 2026.
L-inizjattiva, li għandha baġit ta’ €5 miljun, se tipprovdi ħlas ta’ €5,000 fis-sena għal ħames snin, bil-kundizzjoni li l-liċenzja tas-sewqan tibqa’ sospiża tul il-perjodu kollu. L-iskema se taħdem fuq bażi ta’ min japplika l-ewwel, jinqeda l-ewwel.
Id-dettalji tħabbru waqt konferenza tal-aħbarijiet indirizzata mill-Ministru għat-Trasport Chris Bonett u mill-Kap Eżekuttiv ta’ Transport Malta Kurt Farrugia. Din il-miżura kienet fost sensiela ta’ inizjattivi kontra t-traffiku mħabbra mill-Gvern f’Marzu li għadda.
“Qed noffru inċentiv qawwi lil dawk li jridu jbiddlu l-mod kif jivvjaġġaw,” qal Bonett, filwaqt li spjega li l-iskema tifforma parti minn viżjoni fit-tul biex titnaqqas id-dipendenza fuq il-karozza privata.
Il-Ministru rrefera wkoll għall-pjanijiet biex jissaħħu l-konnessjonijiet bil-baħar permezz ta’ sistema ta’ laneċ li torbot in-nofsinhar u t-tramuntana tal-pajjiż, li mistennija tgħin biex tonqos il-pressjoni fuq it-toroq.
Min-naħa tiegħu, il-Kap Eżekuttiv ta’ Transport Malta Kurt Farrugia qal li l-awtorità se tkun responsabbli mill-amministrazzjoni tal-iskema, filwaqt li sostna li din hija mfassla biex toffri ċertezza lill-applikanti u fl-istess ħin tħares l-interess pubbliku.
Aktar dettalji dwar il-kriterji ta’ eliġibbiltà u l-proċess tal-applikazzjoni se jitħabbru fuq is-sit ta’ Transport Malta.
