Il-Ministru tal-Intern u s-Sigurtà Nazzjonali, Byron Camilleri, ħabbar li l-ħaddiema li jqassmu l-ikel tat-takeaway li jaħdmu ma’ pjattaformi bħal Bolt u Wolt dalwaqt se jkunu parti minn unjoni u mgħoddija taħt ftehim kollettiv.
Fi stqarrija fuq il-midja soċjali, Camilleri saħaq li l-Gvern kien ċar u deċiż fl-aħħar xhur biex jirregola dan is-settur, u enfasizza li “ma hemmx spazju għall-abbuż.” Huwa rrimarka wkoll li l-awtoritajiet saħansitra rrifjutaw applikazzjonijiet ġodda minn pjattaformi ta’ kurjers, minkejja l-kritika li dan ġab miegħu.
Wara laqgħa li saret riċentement, il-Ministru qal li ġie infurmat li l-pass li jmiss se jkun li kull ħaddiem u kull pjattaforma jkunu parti minn unjoni, sabiex ikunu protetti permezz ta’ ftehim kollettiv. Camilleri ddeskriva dan bħala żvilupp pożittiv u żied li l-Gvern se jibqa’ jinsisti fuq kundizzjonijiet ugwali għal kulħadd fis-suq tax-xogħol.
“Se nibqgħu attenti u ma naċċettawx l-ebda forma ta’ sfruttament,” sostna l-Ministru.
Ix-xhur tas-sajf li għadda kienu raw lil Bolt u Wolt jiffirmaw memorandum ta’ ftehim mal-Assoċjazzjoni tal-Operaturi tal-Flotot tal-Kunsinni, bil-għan li jissaħħaħ ir-rispett lejn ir-regolamenti. Permezz ta’ dan il-ftehim, l-MDFOA għandha tmexxi l-implimentazzjoni ta’ “seal of standards”, bl-appoġġ ta’ kumpanija indipendenti ta’ auditing li se tivvaluta l-prattiki tal-flotot u tiżviluppa rapporti ta’ prestazzjoni.
Dak iż-żmien, l-MDFOA kienet ukoll f’diskussjonijiet mal-General Workers Union dwar ftehim kollettiv possibbli sabiex jissaħħu d-drittijiet tal-kurjers u jitjiebu l-kundizzjonijiet tax-xogħol tagħhom fuq il-pjattaformi differenti.
Għalkemm il-Ministru indika li l-kurjers se jkunu parti minn unjoni, ma speċifikax liema unjoni se tkun qed tieħu ħsieb l-organizzazzjoni u l-protezzjoni tagħhom taħt il-ftehim kollettiv.
