Esploratur lokali jwissi b'siti oħra ta' periklu għall-pubbliku

Esploratur lokali u kreatur tal-kontenut, Pierre Farrugia, żar l-Irdum tal-Munxar fejn hu ra b'għajnejh stess il-periklu li dan jista' jkun għan-nies li jkunu fil-madwar. 

Hu avża lin-nies li jkun hemm ħafna perikli moħbija li kemm it-turisti u anke n-nies tal-lokal ma jindunawx bihom. Farrugia beda l-vjaġġ tiegħu mill-Batterija tar-Riħama, fejn tilfet ħajjitha Mirabelle Falzon s-sena l-oħra. Wara dan l-aċċident, iż-żona ingħalqet għas-sigurta' tal-pubbliku.

Farrugia kompla jaqdef fejn spiċċa f'bajja żgħira fid-direzzjoni tat-Tieqa tal-Munxar, b'ġebel qed jaqaw u l-unika post fejn wieħed jista' jsib kenn mix-xemx tiżreġ huwa taħt dawn il-ġebel fraġli. Din iż-żona hija popolari ħafna mat-turisti li jmorru sabiex jieħdu ritratt tal-veduta fenomenali.

It-Tieqa tal-Munxar, hija attrazzjoni popolari mat-turisti u anke mal-Maltin, li jmorru jgħumu jew jaqdfu bil-kayak. In-nies tal-post jafu li sena b'sena, din it-tieqa qed tkompli tiġġarraf sal-punt li wieħed jista' jaqla' ġebla mill-qiegħ tat-tieqa. 

Il-mixja fejn it-tieqa hi ta' periklu wkoll, speċjalment fiż-żona ta' barra tal-irdum fejn ikun hemm ħafna jgħumu, b'ġebel ħa jaqgħu u ma jaqgħux.