Il-Kunsill Lokali ta’ San Pawl il-Baħar approva mozzjoni proposta mill-kunsilliera tal-ADPD Sandra Gauci, li titlob lill-gvern sabiex it-taxxa ekoloġika miġbura mingħand il-viżitaturi li joqogħdu fi stabbilimenti turistici fil-lokalità, tingħata direttament lill-istess kunsill.
Gauci sostniet li San Pawl il-Baħar hu wieħed mill-aktar lokalitajiet milquta mit-turiżmu tal-massa, u minkejja l-kapaċità kbira tiegħu, il-konsegwenzi fuq il-ħajja ta’ kuljum taċ-ċittadini huma kbar. Hija qalet li hemm bżonn urġenti li l-kunsilli lokali jingħataw aktar għajnuna finanzjarja biex ikunu jistgħu jindirizzaw l-isfidi relatati mal-manutenzjoni, il-ġbir tal-iskart u t-tiswijiet meħtieġa.
Il-kunsilliera tal-ADPD sostniet li l-ewwel pass jista’ jkun li l-gvern jibda jittrasferixxi t-taxxa fuq is-sodod tat-turisti direttament lill-kunsilli lokali, flok jerġa’ jqassamha lura lis-settur turistiku. Gauci sejħet ukoll sabiex jitneħħa l-limitu ta’ €5 u jitqies żieda fil-miżata ta’ €0.50c kuljum, sabiex tirrifletti aħjar l-impatti reali tat-turiżmu fuq il-komunitajiet.
Il-kunsilliera tal-Partit Laburista vvutaw kontra l-mozzjoni u ma ħadux sehem f’diskussjonijiet ulterjuri matul il-laqgħa uffiċjali tal-kunsill.
Il-Kunsill Lokali ta’ San Pawl il-Baħar issa qed jistenna tweġiba formali mill-gvern dwar it-talba tiegħu, li fi kliem il-kunsill se tiddeċiedi “jekk hux se jirrispetta jew le d-demokrazija lokali”. F’kumment ulterjuri, il-kunsill sostna li l-gvern “irid iżomm kontroll sħiħ u jidderieġi kif għandhom jaħdmu l-kunsilli lokali, flok isaħħaħ id-demokrazija lokali.”
