L-Awtorità Maltija għas-Servizzi Finanzjarji (MFSA) ħarġet twissija pubblika kontra żewġ entitajiet li qed joperaw online mingħajr ebda awtorizzazzjoni, filwaqt li jużaw b’mod abbużiv dettalji ta’ kumpaniji reġistrati f’Malta.
L-ewwel każ jikkonċerna lil AdmiralCfd, li għandha preżenza fuq https://admiralcfd.com. Din il-websajt qed tuża d-dettalji ta’ kumpanija awtorizzata mill-MFSA, IFH Capital Trader Limited (C63585), mingħajr il-kunsens tagħha. L-Awtorità qalet b’mod ċar li AdmiralCfd mhijiex kumpanija reġistrata f’Malta, u lanqas għandha xi rabta mal-entità leġittima msemmija. Il-websajt tidher li hija kopja falza ta’ dik tal-kumpanija ġenwina, u l-pubbliku ġie mwissi biex jevita kull tip ta’ tranżazzjoni jew interazzjoni magħha.
Entità oħra, bl-isem ta’ Polaris Invest Ltd, ukoll ġiet identifikata mill-MFSA bħala perikoluża. Din għandha sit elettroniku fuq https://polarisinvestltd.com, fejn b’mod qarrieqi tiddikjara li hija kumpanija ta’ kummerċ u investiment “legali reġistrata f’Malta”. Skont l-Awtorità, Polaris Invest Ltd mhijiex reġistrata u lanqas liċenzjata f’Malta biex toffri servizzi finanzjarji, minkejja li qed tuża indirizz reġistrat ta’ kumpanija awtorizzata lokali.
L-MFSA qalet li dawn huma każijiet ċari ta’ abbuż u frodi, u għalhekk tfakkar lill-konsumaturi biex qabel jidħlu f’xi ftehim finanzjarju jiċċekkjaw li l-entità hija awtorizzata jew mill-MFSA jew minn regolatur internazzjonali ta’ reputazzjoni tajba.
Lista sħiħa ta’ kumpaniji awtorizzati tista’ tiġi kkontrollata fuq is-sit uffiċjali tal-Awtorità: https://www.mfsa.mt/financial-services-register/.
Il-pubbliku ġie mfakkar ukoll li kull min jissuspetta li jista’ jkun vittma ta’ scam għandu jieqaf minnufih milli jagħmel tranżazzjonijiet u jikkuntattja lill-MFSA fuq https://www.mfsa.mt/about-us/contact/
