1.4 miljun turist f’Malta waqt l-ewwel ħames xhur tal-2025

Bejn Jannar u Mejju 2025, Malta laqgħet aktar minn 1.4 miljun turist — żieda ta’ 14.3% meta mqabbel mal-istess perjodu fl-2024. 

Skont data ġdida maħruġa mill-Uffiċċju Nazzjonali tal-Istatistika, in-numru ta’ turisti li ġew Malta matul dawn il-ħames xhur laħaq il-1,418,954. F’Mejju biss, ġew irreġistrati 347,317 turist, li minnhom 17,910 ġew għal raġunijiet ta’ negozju. 

Aktar minn 36% tat-turisti li ġew f’Mejju kellhom bejn 25 u 44 sena, u kważi 45% kienu residenti Brittanniċi, Taljani, jew Franċiżi. 

It-turisti qattgħu 2.2 miljun lejl f’Malta f’Mejju, b’90.7% ta’ dawn l-iljieli jintefqu f’akkomodazzjoni mikrija bħalm’huma lukandi u bed & breakfasts. 

L-infiq totali mit-turisti f’Mejju laħaq it-€363.6 miljun — jiġifieri medja ta’ €165 għal kull lejl — żieda ta’ 16.9% meta mqabbel ma’ Mejju 2024. 

Barra minn hekk, 59.3% tat-turisti żaru Għawdex u Kemmuna waqt iż-żjara tagħhom. 

Fl-ewwel ħames xhur tas-sena, l-infiq totali mit-turisti laħaq €1.1 biljun — 21.9% aktar minn dak irreġistrat fl-istess perjodu fl-2024.