Mil-lum, it-Tlieta 1 ta’ Lulju, daħlet fis-seħħ il-liġi li tagħti obbligu lil kull kuntrattur li jaħdem fit-twaqqigħ, l-iskavar u l-bini li jkollu liċenzja valida biex jopera. Dan il-pass ġie implimentat mill-Awtorità tal-Bini u l-Kostruzzjoni (BCA) biex tiġi żgurata kwalità ogħla fis-settur u biex jiġu eliminati operaturi mhux awtorizzati.
Skont l-aħħar dejta, il-Kumitat Indipendenti tal-Liċenzjar tal-Kuntratturi approva total ta’ 2,265 liċenzja f’dawn l-aħħar xhur, li jinkludu 832 liċenzja għal operazzjonijiet ta’ twaqqigħ, 509 għaskavar, u 924 għall-bini. B’hekk, issa qed isir kontroll aktar strett fuq min qed jopera fis-settur, u dan qed jgħin biex itejjeb is-sigurtà u l-professjonalità.
Il-proċess tal-liċenzjar sar b’mod rigoruż u kompleta b’laqgħat informattivi li saru kemm f’Malta kif ukoll f’Għawdex biex jgħinu lill-operaturi jifhmu r-rekwiżiti. Barra minn hekk, il-BCA offriet appoġġ permezz ta’ helpline biex tirrispondi għal mistoqsijiet u toffri gwida.
Min-naħa l-oħra, l-awtorità rduppjat in-numru ta’ spetturi biex tassigura aktar sorveljanza u kontroll fis-siti tal-kostruzzjoni, u bħalissa hemm ħames spetturi ġodda li jinsabu fi stadju ta’ ingaġġ.
Il-BCA qed taħdem ukoll fuq it-tfassil ta’ Kodiċi ġdid tal-Bini u l-Kostruzzjoni li se jiġi introdott gradwalment, biex jissaħħu r-regoli u jiżdied il-livell ta’ responsabbiltà fis-settur.
Fost l-aktar passi importanti hemm ukoll it-tisħiħ tal-iSkill Card, li se ssir obbligatorja għal kull ħaddiem li jaħdem fis-siti tal-kostruzzjoni. Dan għandu l-għan li jtejjeb il-kompetenzi u s-sigurtà fuq il-post tax-xogħol.
L-awtorità tħeġġeġ lill-operaturi kollha li għandhom liċenzja biex jiżguraw li din tkun imħallsa u rinnovata kull sentejn, peress li dawk li ma jħallsux ma jistgħux joperaw b’mod legali.
Din ir-riforma ġdida qed tagħti spinta kbira għas-settur tal-kostruzzjoni f’Malta, billi tagħti aktar trasparenza, regolazzjoni u kontroll fuq min qed jipprovdi servizzi ta’ kostruzzjoni, u fl-istess ħin tiżgura l-istandards għoljin ta’ sigurtà u kwalità.
