Ramla l-Ħamra rat ritorn spettakolari aktar kmieni dalgħodu hekk kif il-fekruna magħrufa bħala Johanna għażlet din il-bajja Għawdxija biex tpoġġi t-tieni bejta tagħha għal dan l-istaġun.
Kien għall-ħabta tal-1am li voluntiera fuq duty li kienu qed jissorveljaw 'Nest 3', innutaw fekruna Loggerhead tiela' fuq il-bajja. L-awtoritajiet ġew infurmati minnufih – inkluża l-Awtorità għall-Ambjent u r-Riżorsi (ERA) – li flimkien mal-uffiċjali preżenti, marru fuq il-post sabiex jivverifikaw l-eżistenza ta’ bejta ġdida.
Wara li ntemmet il-proċedura, il-fekruna ġiet eżaminata u ġew ikkonfermati d-dettalji tagħha permezz ta’ microchip. Kien b’ferħ kbir li l-uffiċjali skoprew li kienet l-istess fekruna – Johanna.
Dan l-iżvilupp issa jfisser li l-għadd totali ta’ bejtiet f’pajjiżna għal din is-sena tela’ għal erbgħa – żieda notevoli meta mqabbla mal-istess perjodu s-sena l-oħra, fejn konna bdejna b'bejta waħda biss. Dan jagħti tama għal staġun promettenti għall-fekruni ta’ Malta u Għawdex.
Appell għall-voluntiera
Għaqdiet ambjentali qed jappellaw għal aktar għajnuna minn voluntiera biex ikunu jistgħu jkomplu jissorveljaw u jipproteġu dawn il-bejtiet tant delikati.
Min jixtieq jgħin f’Għawdex, jista’ jibgħat messaġġ fuq [email protected], filwaqt li dawk f’Malta jistgħu jikkuntattjaw [email protected].
