L-Arċisqof ta' Malta Charles Scicluna kellu kliem iebes kontra l-fatt li bħalissa l-Parlament qed jiddiskuti emendi ġodda fil-liġi tal-IVF b'mod partikolari dwar id-dijanjosi preġenetika tal-embrijuni.
Fi kliem sempliċi, dan il-protokoll iwassal biex ġenituri prospettivi li jirrikorru għall-IVF, qabel l-implamntazzjoni, ikunu jistgħu jagħżlu dawk l-embrijuni li ‘jkunu ħielsa’ minn xi mard ereditarju.
Waqt l-omelija tiegħu, fil-quddiesa li tixxandar kuljum mill-Kurja, l-Arċisqof insista li l-ħajja tibda mit-tnissil.
"Anke jekk ikun hemm xi ħadd bil-kullar li jikkwota xi filosfi jew xi għaref li jgħidu li l-ħajja ma tibdix mit-tnissil, it-tagħlim huwa ċar ħafna. Il-ħajja umana tibda mit-tnissil u rridu nirrispettawha hi min hi u f'liema ċirkostanza hi," kompla l-Arċisqof.
Indirizza direttament lill-Memrbi Parlamentari u rrefera għad-diskussjoni fuq l-emendi tal-IVF.
"Bħalissa qed tiddiskutu, bl-iskuża li jkollna trabi b'saħħithom, li niċċekjaw jekk humiex morda jew le. Ix-xjenza hija għarfa u tgħinna. Imma dawk li huma morda x'se nagħmlu bihom? Narmuhom?", kompla jistaqsi l-Arċisqof.
Kompla jisħaq li anke jekk hemm ħames embrijuni u waqt dan il-proċess ta' dijanjosi preġenetikan jinqatel embrijun wieħed, huwa ħażin għax dik hija ħajja.
"Biex tiċċekja jekk jienx hux b'saħħti, toqtolni. Tagħmel sens din?", kompla jistaqsi l-Arċisqof. "Noqogħdu attenti u ma niċċajtawx ma' Alla fuq il-kwistjoni tal-ħajja. Nitkellmu ċar bħalma nispera li qed nagħmel jien."
Yendrick Cioffi studja l-ġurnaliżmu fl-Università ta' Malta fejn kiseb Baċċellerat bl...
