Uffiċjali tal-Awtorità tal-Ippjanar (PA) bdew ineħħu l-pavimentar li kien tqiegħed mingħajr awtorizzazzjoni fuq art pubblika quddiem ir-ristorant Piccolo Padre, fix-Xatt ta’ Tas-Sliema, kmieni t-Tlieta filgħodu.
L-intervent seħħ wara ġimgħat ta’ kontroversja dwar l-użu ta’ parti mill-bankina u t-triq bħala spazju għall-imwejjed u s-siġġijiet tar-ristorant, li jagħmel parti miċ-Centric Hotel tal-iżviluppatur Carlo Stivala.
Il-każ beda jqajjem reazzjonijiet fost ir-residenti u diversi għaqdiet wara li fuq l-art pubblika twaqqfet struttura tal-metall b’tinda li tinġibed lura, flimkien ma’ pavimentar, qsari u għamara għas-servizz tal-ikel.
Skont l-awtoritajiet, dawn ix-xogħlijiet saru mingħajr il-permessi meħtieġa.
It-tħassib kien jikkonċerna fost oħrajn l-ostakli għall-persuni mexjin, is-sigurtà fit-triq u l-użu ta’ spazji pubbliċi għal skopijiet kummerċjali.
Avviżi ta’ infurzar u żgumbrament
Fit-2 ta’ Ottubru, l-Awtorità tal-Ippjanar ħarġet avviż ta’ infurzar, bin-numru EC/00122/26, li ordna t-tneħħija tax-xogħlijiet mhux awtorizzati.
L-avviż kien jinkludi t-tinda li kienet testendi fuq il-bankina u parti mit-triq, pilastru li kien qed isostniha, il-pavimentar li tqiegħed fuq parti mill-wiċċ tat-triq u l-qsari li kienu jdawru l-ispazju.
It-tinda tneħħiet fis-6 ta’ Ottubru, wara l-intervent tal-PA u l-pressjoni pubblika. Madankollu, il-pavimentar u elementi oħra tal-istruttura baqgħu f’posthom, filwaqt li l-imwejjed u s-siġġijiet reġgħu tpoġġew fiż-żona.
Fl-14 ta’ Ottubru, l-Awtorità tal-Artijiet ħarġet ukoll avviż ta’ żgumbrament kontra Stivala, li tah 30 jum biex ibattal l-art pubblika li kienet qed tiġi okkupata.
Fl-avviż tagħha, l-Awtorità sostniet li Stivala ma kellu l-ebda titolu jew permess li jawtorizzah juża dik il-parti tal-art, u ordnatlu jneħħi kull struttura jew oġġett li kien tqiegħed hemmhekk.
Skont rapporti, Stivala kien ressaq talba għal konċessjoni ta’ encroachment fis-6 ta’ Ottubru. Madankollu, l-Awtorità tal-Artijiet spjegat li konċessjoni bħal din setgħet tingħata biss jekk l-Awtorità tal-Ippjanar toħroġ il-permess għall-iżvilupp meħtieġ.
Pressjoni mill-għaqdiet u r-residenti
Il-kontroversja wasslet għal sejħiet ripetuti biex l-awtoritajiet ma jippermettux li l-attività kummerċjali tkompli fuq l-art pubblika sakemm jiġu regolarizzati x-xogħlijiet.
Moviment Graffitti kien wissa li lest jieħu azzjoni diretta jekk l-ispazju ma jitbattalx u l-istrutturi ma jitneħħewx.
L-Assoċjazzjoni tar-Residenti ta’ Tas-Sliema u l-Kunsill Lokali wkoll talbu intervent, filwaqt li esprimew tħassib dwar l-aċċess għall-persuni mexjin u l-perikli li setgħu jinħolqu minħabba l-pożizzjoni tal-istruttura qrib junction.
Fit-13 ta’ Ottubru, koalizzjoni ta’ 18-il organizzazzjoni appellat lill-awtoritajiet biex ineħħu l-għamara u kull żieda oħra li kienet saret fiż-żona.
L-għaqdiet insistew ukoll li kwalunkwe applikazzjoni biex l-ispazju jintuża għall-imwejjed u s-siġġijiet għandha tiġi eżaminata skont il-liġijiet u l-politiki tal-ippjanar applikabbli.
L-intervent tat-Tlieta filgħodu jimmarka pass ieħor fl-infurzar kontra x-xogħlijiet mhux awtorizzati, wara li t-tneħħija tat-tinda aktar kmieni dan ix-xahar ma kinitx wasslet biex l-ispazju jitbattal kompletament
