Moviment Graffitti rringrazzja lill-pubbliku għall-appoġġ li wera fil-kampanja tiegħu biex “isalva Kemmuna”, wara li t-Tribunal tal-Ambjent u l-Ippjanar issospenda temporanjament permess tal-Awtorità għall-Ambjent u r-Riżorsi li kien jippermetti l-qlugħ ta’ 800 siġra u l-bidu ta’ xogħlijiet tqal marbuta mal-proġett propost tal-Hili Group.
Id-deċiżjoni, meħuda mit-Tribunal tal-Ambjent u l-Ippjanar it-Tlieta, tfisser li x-xogħlijiet ma jistgħux jimxu ’l quddiem sakemm ikun għadu qed jinstema’ l-appell kontra l-permess tal-ERA.
Diversi NGOs appellaw mid-deċiżjoni tal-ERA, filwaqt li kampanja ta’ crowdfunding biex jiġu ffinanzjati l-ispejjeż legali laħqet u qabżet il-mira tagħha fi ftit sigħat.
B’mod separat, fl-2025 kienet infetħet ukoll kawża kontra l-approvazzjoni mill-Awtorità tal-Ippjanar ta’ żvilupp li jinkludi lukanda b’140 sodda, 16-il villa u 44 swimming pool f’Kemmuna.
Skont Graffitti, il-proġett propost iżid kemm il-volum mibni kif ukoll il-footprint meta mqabbel mal-binjiet eżistenti, u jwassal għal attività aktar intensa fir-riżerva naturali matul is-sena kollha.
Aktar kmieni din is-sena, il-Qorti laqgħet wieħed mill-argumenti mressqa mill-NGOs u bagħtet il-każ lura quddiem it-Tribunal biex jerġa’ jiġi evalwat.
Graffitti qal li se jkompli jopponi kwalunkwe xogħol marbut mal-proġett tal-lukanda u l-vilel sakemm il-permess tal-Awtorità tal-Ippjanar jibqa’ soġġett għal sfida fil-Qorti.
Il-Moviment qal li dan jinkludi xogħlijiet ta’ twaqqigħ, tħaffir u kostruzzjoni, kif ukoll il-qlugħ tas-siġar, għaliex il-permess jista’ xorta waħda jiġi emendat b’mod sostanzjali jew revokat bħala riżultat tal-proċeduri li għadhom għaddejjin.
L-għaqda appellat lill-pubbliku biex jirrapporta kwalunkwe xogħol marbut mal-proġett qabel ma l-isfida legali tkun deċiża b’mod definittiv.
Rapporti jistgħu jintbagħtu lil Moviment Graffitti fuq [email protected] jew permezz ta’ WhatsApp fuq 7762 1113.
.jpg)
.jpg)
