ARA | Għasfur protett jinstab ferut b’tiri fl-art f'St Edward’s College
BirdLife Malta reġgħet talbet li l-kaċċa ma tkunx permessa f’raġġ ta’ 200 metru madwar l-iskejjel, wara li nstab Eurasian Hobby ferut fl-art tal-kulleġġ
Studenti li rritornaw St Edward’s College għall-bidu tas-sena skolastika sabu għasfur protett tat-tip Eurasian Hobby ferut fl-art tal-iskola.
BirdLife Malta ġiet imsejħa biex tiġbor l-għasfur, u veterinarju tal-Gvern aktar tard ikkonferma li kien weġġa’ b’tiri ta’ arma tan-nar.
L-inċident wassal lill-għaqda biex terġa’ tappella għall-ħolqien ta’ żona ta’ 200 metru madwar l-iskejjel fejn il-kaċċa ma tkunx permessa.
BirdLife Malta kienet diġà ressqet proposta f’dan is-sens, iżda qalet li din kienet ġiet miċħuda mill-Kumitat ORNIS u ma kinitx kisbet l-appoġġ tal-membri maħtura mill-Gvern jew tal-Awtorità għall-Ambjent u r-Riżorsi.
Il-Kap Eżekuttiv ta’ BirdLife Malta, Mark Sultana, qal li t-tfal għandhom ikunu jistgħu jmorru l-iskola mingħajr ma jisimgħu sparar jew isibu għasafar protetti midruba fl-istess art tal-iskola.
“L-iskejjel għandhom ikunu postijiet siguri kemm għat-tfal kif ukoll għall-ħajja selvaġġa,” qal Sultana.
L-għaqda sostniet li l-istudenti għandhom ikunu jistgħu jitgħallmu mingħajr ma jkunu esposti għar-riskji u l-inkonvenjent marbut mal-kaċċa, filwaqt li l-għasafar protetti għandhom jingħataw il-ħarsien previst mil-liġi.
BirdLife Malta rabtet ukoll l-inċident mad-dibattitu dwar il-penali għal min jikser il-liġijiet li jipproteġu l-għasafar selvaġġi, u appellat lill-Gvern biex ma jnaqqasx dawn il-penali.
Minflok, talbet infurzar aktar b’saħħtu u konsegwenzi effettivi għal min joqtol illegalment għasafar protetti.
Jaelle Borg hija studenta tat-tielet sena fil-Kriminoloġija u ġurnalista ma' din il-gazz...
