Il-President tmexxi ċ-ċerimonji ta’ Jum il-Vitorja fil-Belt Valletta

Il-President Myriam Spiteri Debono mexxiet iċ-ċerimonji uffiċjali ta’ Jum il-Vitorja li saru fil-Belt Valletta dalgħodu.

Iċ-ċerimonja bdiet bis-salut nazzjonali, qabel il-President spezzjonat il-Gwardja tal-Unur.

Spiteri Debono mbagħad poġġiet kuruna ta’ fjuri f’riġlejn il-Monument tal-Assedju l-Kbir, bħala parti mill-attivitajiet nazzjonali li ta’ kull sena jfakkru t-8 ta’ Settembru.

Wara saret quddiesa pontifikali fil-Konkatidral ta’ San Ġwann, immexxija mill-Isqof Awżiljarju Joseph Galea-Curmi.

Jum il-Vitorja jfakkar mumenti importanti fl-istorja ta’ Malta, fosthom ir-rebħa fl-Assedju l-Kbir tal-1565 kontra l-Imperu Ottoman.

It-8 ta’ Settembru jfakkar ukoll il-kapitulazzjoni tal-Italja fl-1943 matul it-Tieni Gwerra Dinjija, li temmet l-attakki Taljani fuq Malta.

Minbarra s-sinifikat storiku tiegħu, it-8 ta’ Settembru huwa wkoll il-festa tat-Twelid tal-Verġni Marija, magħrufa f’Malta bħala l-Bambina.

Il-festa qed tiġi ċċelebrata llum fil-Mellieħa, l-Isla u n-Naxxar f’Malta, kif ukoll fix-Xagħra f’Għawdex.