Il-Gvern appella għall-kawtela wara l-verdett fil-każ tal-qtil ta’ Daphne Caruana Galizia, filwaqt li wissa li m’għandu jingħad jew isir xejn li jista’ jippreġudika proċessi ġudizzjarji jew investigattivi li għadhom għaddejjin.
Fi stqarrija, il-Gvern qal li din il-prudenza hija partikolarment importanti minħabba li għadu għaddej terminu legali marbut mal-proċeduri kriminali, kif ukoll fid-dawl tad-deċiżjoni tal-Qorti li tgħaddi xhieda li nstemgħet waqt il-ġuri lil żewġ inkjesti maġisterjali li għadhom għaddejjin.
Il-Qorti bagħtet ukoll l-istess xhieda lill-Kummissarju tal-Pulizija sabiex jiġi evalwat jekk terzi persuni jistgħux ikunu suġġetti għal proċeduri kriminali.
Il-kummenti tal-Gvern saru wara li l-Qorti Kriminali, preseduta mill-Imħallef Edwina Grima, tat is-sentenza tagħha wara l-verdett tal-ġurija fil-proċeduri kriminali marbuta mal-qtil tal-ġurnalista.
Il-Gvern qal li ħa nota tas-sentenza u tenna l-impenn tiegħu li jiżgura li l-istituzzjonijiet tal-pajjiż ikunu jistgħu jwettqu l-funzjonijiet tagħhom b’mod sħiħ u effettiv, b’rispett sħiħ lejn is-saltna tad-dritt.
Huwa qal ukoll li se jkompli jipprovdi r-riżorsi meħtieġa biex il-korpi investigattivi u ġudizzjarji jkunu jistgħu jagħmlu xogħolhom mingħajr xkiel.
Fl-istess waqt, il-Gvern reġa’ appella għar-restrizzjoni fil-kummenti pubbliċi, u saħaq li proċessi li għadhom miftuħa m’għandhomx jiġu affettwati minn stqarrijiet jew azzjonijiet li jsiru wara l-verdett.
