Il-Partit Nazzjonalista nieda konsultazzjoni miftuħa dwar l-abbozzi relatati mal-Kummissjoni għad-Drittijiet tal-Bniedem u l-Ugwaljanza, li bħalissa jinsabu għad-diskussjoni fil-parlament.
Dawk li jixtiequ jressqu proposti u jgħinu jfasslu l-pożizzjoni tal-PN jistgħu jagħmlu dan permezz tal-formola online tal-partit. Is-sottomissjonijiet se jibqgħu miftuħa sat-18 ta’ Settembru.
Fi stqarrija, il-PN stieden lis-sħab soċjali, għaqdiet tas-soċjetà ċivili, esperti, professjonisti, komunitajiet affettwati u kull min għandu interess fil-bidliet proposti biex jieħu sehem fil-proċess.
Il-partit qal li l-konsultazzjoni għandha tiġbor firxa wiesgħa ta’ esperjenzi u proposti, fosthom dwar l-indipendenza u l-kompożizzjoni tal-Kummissjoni, il-protezzjoni tad-drittijiet fundamentali, il-proċeduri ta’ investigazzjoni u rimedju, iċ-ċertezza legali u l-impatt li l-liġi tista’ jkollha fuq setturi differenti.
Il-PN fakkar li f’Lulju li għadda, skontu, il-gvern ipprova jgħaddi l-Abbozz minn stadji parlamentari kruċjali f’temp ta’ ftit jiem, ftit qabel il-waqfa tas-sajf.
Il-partit qal li dan sar minkejja appelli ripetuti mill-Oppożizzjoni u minn diversi organizzazzjonijiet, fosthom sħab soċjali, gruppi tad-drittijiet tal-bniedem, unions, skejjel tal-Knisja u korpi professjonali, li talbu aktar ħin u konsultazzjoni xierqa.
“Il-gvern injora dawn l-appelli u baqa’ jinsisti li jressaq l-Abbozz għall-vot finali,” qal il-PN.
L-Abbozz eventwalment ma kisibx il-maġġoranza meħtieġa ta’ żewġ terzi. Id-deputati tal-Oppożizzjoni ħarġu mill-parlament wara li, skont il-PN, it-talbiet tagħhom għal aktar konsultazzjoni ġew miċħuda, u l-liġi ma għaddietx.
Il-partit saħaq li jappoġġja l-ħarsien tad-drittijiet tal-bniedem, il-promozzjoni tal-ugwaljanza u l-ġlieda kontra kull forma ta’ diskriminazzjoni.
Madankollu, sostna li hemm bżonn Kummissjoni b’saħħitha, indipendenti u imparzjali, li tkun tista’ twettaq il-funzjonijiet tagħha mingħajr indħil politiku.
“Liġi li taffettwa d-drittijiet fundamentali, lill-ħaddiema u lil min iħaddem, lill-istituzzjonijiet edukattivi, lin-negozji, lill-professjonisti u lis-soċjetà kollha kemm hi ma tistax titfassal u tgħaddi bil-għaġla, mingħajr konsultazzjoni ġenwina,” qal il-partit.
Il-PN temm jgħid li riforma serja għandha tinbena fuq djalogu, għarfien espert u bilanċ ġust bejn id-drittijiet u r-responsabbiltajiet, u mhux fuq deċiżjonijiet meħuda minn qabel mill-gvern u imposti fuq il-bqija tas-soċjetà.
