L-introduzzjoni ta’ robots bħala waiters mhix is-soluzzjoni xierqa għan-nuqqas ta’ ħaddiema fis-settur tal-ospitalità, qalet il-General Workers’ Union.
Is-Segretarju Ġenerali tal-GWU Kevin Camilleri qal li t-teknoloġija tista’ tgħin biex tnaqqas il-piż tax-xogħol u tagħmel is-servizzi aktar effiċjenti, iżda ma tistax tissostitwixxi l-element uman li fuqu hija mibnija l-ospitalità.
“Robot jista’ jwassal platt, iżda ma jistax jilqa’ mistieden bi tbissima, jiftakar ismu jew iġiegħlu jħossu verament milqugħ,” qal Camilleri. “L-ospitalità hija industrija mibnija fuq in-nies u l-interazzjoni umana.”
Il-GWU rrimarkat li t-turiżmu jsostni madwar 48,000 impjieg u jirrappreżenta aktar minn 10% tal-Prodott Domestiku Gross ta’ Malta.
Skont l-union, is-suċċess tas-settur ma jiddependix biss mill-effiċjenza, iżda wkoll mill-komunikazzjoni, il-merħba u l-attenzjoni personali li l-ħaddiema jagħtu lill-klijenti.
Filwaqt li tirrikonoxxi l-benefiċċji tat-teknoloġija, il-GWU insistiet li din għandha tintuża biex tissapportja lill-ħaddiema aktar milli tneħħi l-ħtieġa għall-preżenza tagħhom.
Camilleri sostna li qabel jibda diskors dwar is-sostituzzjoni tal-ħaddiema, hemm bżonn jiġu indirizzati l-kundizzjonijiet li qed iwasslu għan-nuqqas ta’ ħaddiema u li qed jagħmlu s-settur inqas attraenti.
“Hemm bżonn ninvestu f’pagi aħjar, kundizzjonijiet tax-xogħol diċenti, taħriġ u opportunitajiet ta’ karriera,” qal. “Jekk irridu nattiraw u nżommu aktar ħaddiema fl-ospitalità, irridu nagħmlu s-settur aktar sostenibbli u attraenti.”
Il-GWU qalet ukoll li Malta għandha tagħmel użu aħjar mill-potenzjal tas-silver economy, u enfasizzat li ħaddiema akbar fl-età għandhom esperjenza, għarfien u ħiliet li jistgħu jibqgħu jagħtu kontribut lis-suq tax-xogħol.
Fost il-miżuri li semmiet hemm arranġamenti ta’ xogħol aktar flessibbli, taħriġ kontinwu u skemi li jippermettu tranżizzjoni gradwali lejn l-irtirar.
“Id-diskussjoni dwar il-futur tal-ospitalità trid issir mal-ħaddiema u mar-rappreżentanti tagħhom,” qal Camilleri.
“Il-futur tax-xogħol ma jistax jinbena billi n-nies jitwarrbu. Għandu jinbena billi t-teknoloġija tintuża b’mod responsabbli biex ittejjeb kemm il-kwalità tax-xogħol kif ukoll il-kwalità tas-servizz.”
Il-GWU temmet tgħid li se tkompli tinsisti fuq soluzzjonijiet fit-tul li jpoġġu lill-ħaddiema fiċ-ċentru, isaħħu l-kundizzjonijiet tax-xogħol u jħarsu l-kwalità u r-reputazzjoni tal-prodott turistiku Malti.
.png)
.png)
