L-Assoċjazzjoni Maltija tal-Piroteknika (MPA) appellat għal aktar kooperazzjoni bejn il-partijiet kollha wara l-inġunzjoni tal-qorti li affettwat l-ispettakli tan-nar tal-festa ta' Birżebbuġa.
Il-President tal-MPA, Godfrey Farrugia, qal li n-nar tal-art huwa parti essenzjali mill-festi Maltin u jirrappreżenta element importanti tal-identità u l-wirt kulturali tal-pajjiż.
"L-ispettakli tan-nar huma parti mill-memorja kollettiva tagħna u jagħtu identità u awtentiċità lill-komunitajiet Maltin," sostna Farrugia.
L-istqarrija saret wara li l-qorti kkonfermat inġunzjoni temporanja li tipprojbixxi l-isparar tan-nar waqt il-festa ta' Birżebbuġa minħabba tħassib dwar allegata ħsara lil razzett u art agrikola fil-viċin.
Madankollu, waqt is-seduta tal-qorti tas-Sibt intlaħaq ftehim interim bejn il-partijiet, li ppermetta li jsir spettaklu mnaqqas matul tmiem il-ġimgħa, wara li ż-żewġ għaqdiet tan-nar impenjaw ruħhom li jnaqqsu kemm it-tip kif ukoll il-kwantità tan-nar użat. Il-qorti approvat dan il-ftehim, filwaqt li kkonfermat li l-inġunzjoni reġgħet daħlet fis-seħħ mit-3 ta' Awwissu.
L-MPA enfasizzat li kull spettaklu tan-nar isir biss wara li jinħareġ permess li jispeċifika l-ħinijiet, it-tul tal-ispettaklu, id-distanzi tas-sigurtà u t-tip ta' materjal pirotekniku li jista' jintuża.
L-assoċjazzjoni spjegat ukoll li l-pirotekniċi liċenzjati huma obbligati josservaw ir-regolamenti kollha u li kull attività tkun koperta b'assigurazzjoni, filwaqt li jsiru arranġamenti ta' sigurtà flimkien mal-Protezzjoni Ċivili, il-Pulizija, Transport Malta u l-LESA.
Skont l-MPA, sfida dejjem tikber hija l-iżvilupp u l-użu mhux awtorizzat ta' art fiż-żoni ta' sigurtà madwar il-postijiet minn fejn jinħaraq in-nar. Intqal li f'xi każijiet dawn iż-żoni qed jintużaw bħala scrapyards, boatyards, siti ta' skart jew għal attivitajiet kummerċjali mhux awtorizzati.
L-assoċjazzjoni appellat lill-membri tagħha biex ikomplu jaħdmu mill-qrib mal-awtoritajiet u ma' partijiet terzi sabiex jitnaqqsu kemm jista' jkun ir-riskji u l-inkonvenjenzi, filwaqt li appellat ukoll lill-pubbliku biex jirrispetta d-direttivi maħruġa mill-esperti u mill-awtoritajiet.
Farrugia temm jgħid li l-preservazzjoni tat-tradizzjonijiet pirotekniċi hija responsabbiltà kollettiva tal-gvern u taċ-ċittadini kollha sabiex dan il-wirt kulturali jgħaddi wkoll lill-ġenerazzjonijiet futuri.
.png)
