Il-Kap tal-Oppożizzjoni Alex Borg u l-Kelliem tal-PN għall-Enerġija Mark Anthony Sammut ressqu mozzjoni ta' ċensura u sfiduċja fil-Ministru għall-Enerġija Miriam Dalli.
Permezz tal-mozzjoni, il-Partit Nazzjonalista qed jitlob lill-Prim Ministru Robert Abela biex jew jitlob ir-riżenja ta' Dalli jew ineħħiha mill-kariga.
Il-mozzjoni tiffoka fuq il-mod kif il-Gvern indirizza l-qtugħ riċenti tad-dawl, li skont il-PN ħalla eluf ta' familji u negozji mingħajr elettriku għal sigħat twal waqt il-mewġa ta' sħana.
Il-PN sostna li din is-sitwazzjoni tirrepeti l-kriżi tal-elettriku tas-sajf tal-2023, meta kien ressaq ukoll mozzjoni ta' sfiduċja fil-Ministru.
Il-mozzjoni tirreferi wkoll għar-rapport tal-Uffiċċju Nazzjonali tal-Verifika (NAO) dwar l-ippjanar u l-investiment fin-network tad-distribuzzjoni tal-elettriku.
Skont il-PN, ir-rapport identifika nuqqasijiet serji fl-ippjanar ta' Enemalta u kkonkluda li n-nuqqas ta' investiment fin-network tad-distribuzzjoni kien il-kawża ewlenija tal-kriżi tal-elettriku.
L-Oppożizzjoni sostniet li l-Gvern naqas milli jippjana b'mod adegwat għaż-żieda fid-domanda għall-elettriku, minkejja t-tkabbir sostanzjali fil-popolazzjoni, u b'hekk ħalla l-infrastruttura ma tlaħħaqx mad-domanda.
Il-PN ikkritika wkoll lil Dalli talli, skontu, irrifjutat li ġġorr ir-responsabbiltà politika għall-fallimenti fis-settur li jaqa' taħt il-portafoll tagħha, minkejja l-impatt estensiv tal-qtugħ tad-dawl.
Il-partit argumenta li ministri għandhom jerfgħu r-responsabbiltà politika meta fallimenti taħt ir-responsabbiltà tagħhom iwasslu għal kriżi nazzjonali li taffettwa l-ħajja ta' kuljum u s-saħħa tan-nies.
Il-mozzjoni tikkonkludi li l-poplu Malti u Għawdxi jistħoqqlu infrastruttura moderna, servizz tal-elettriku affidabbli u Gvern li jerfa' r-responsabbiltà għad-deċiżjonijiet tiegħu.
