Wara jiem ta' qtugħ ripetut tad-dawl f'diversi lokalitajiet madwar Malta, il-Partit Nazzjonalista se jitlob dibattitu urġenti dwar is-sitwazzjoni tal-enerġija waqt is-seduta parlamentari ta' nhar it-Tnejn.
F'filmat fuq Facebook, il-Kap tal-Oppożizzjoni Alex Borg qal li se jitlob lill-Gvern jagħti spjegazzjoni ċara dwar dak li qed jiġri fis-settur tal-enerġija u jippreżenta pjan biex il-pajjiż ma jibqax jiffaċċja sjuf b'qtugħ kontinwu tad-dawl.
"Ma nistgħux nibqgħu nisimgħu skużi. Għandna bżonn responsabbiltà," qal Borg.
Huwa qal li, wara li tkellem ma' diversi familji milquta, jidher ċar li l-qtugħ tad-dawl m'għadux każ iżolat iżda konsegwenza ta' nuqqas ta' ppjanar fis-sistema tad-distribuzzjoni tal-enerġija.
Min-naħa tiegħu, il-Kelliem tal-Oppożizzjoni għall-Enerġija Mark Anthony Sammut irrefera għal rapport tal-Awditur Ġenerali tal-2024, li kkonkluda li l-kawża ewlenija tal-problema hija "nuqqas kroniku ta' investiment" fin-network ta' vultaġġ għoli matul l-aħħar għaxar snin.
Ir-rapport sab ukoll li n-nefqa annwali tal-Gvern fuq is-sistema tad-distribuzzjoni kienet tliet darbiet inqas minn dik tal-għaxar snin ta' qabel, minkejja ż-żieda fil-popolazzjoni.
Sammut semma wkoll diversi każijiet ta' persuni affettwati mill-qtugħ tad-dawl.
Fosthom kien hemm mara li qalet li żewġha, li għandu l-kanċer, tilef appuntament mediku importanti minħabba li l-lift tal-blokka waqaf jaħdem waqt qtugħ tad-dawl u hi ma setgħetx tniżżlu erba' sulari.
Raġel ta' 92 sena qal li s-sodda elettrika tiegħu waqfet taħdem u li ma jiflaħx jgħaddi sajf ieħor mingħajr arja kkundizzjonata jew fann.
Persuna oħra qalet li, għat-tielet lejl konsekuttiv, kellha tagħżel bejn issajjar jew taħsel il-ħwejjeġ tax-xogħol minħabba problemi fil-vultaġġ li ma jippermettux li jintużaw diversi apparati fl-istess ħin.
"Dan huwa r-raba' sajf li fih in-nies qed ibatu minħabba l-qtugħ tad-dawl. M'għadhiex problema lokalizzata; qed isseħħ kullimkien. Lanqas m'għadha limitata għall-ħinijiet tal-quċċata filgħaxija; issa qed isseħħ ukoll filgħodu. In-nies ma jistgħux jibqgħu jissaportu dan," qal Sammut.
.png)
