Fearne jikkonferma l-oppożizzjoni ta' Malta għat-tkeċċija furzata tal-Palestinjani

Il-Ministru għall-Affarijiet Barranin Chris Fearne tenna l-oppożizzjoni ċara ta' Malta għat-tkeċċija furzata tal-Palestinjani waqt laqgħa mal-Prim Ministru Palestinjan Mohammed Mustafa, qabel il-laqgħa tal-Palestine Donor Group.

Matul il-laqgħa, Mustafa spjega s-sitwazzjoni diffiċli f'Gaża u fix-Xatt tal-Punent, filwaqt li enfasizza l-isfidi ekonomiċi serji li qed jaffaċċja l-poplu Palestinjan minħabba l-kunflitt li għaddej ma' Iżrael.

Fearne reġa' afferma l-appoġġ storiku ta' Malta għall-Palestina u fakkar fir-rikonoxximent tal-Istat tal-Palestina minn Malta f'Settembru 2025, kif ukoll fl-appoġġ kontinwu tagħha għal soluzzjoni b'żewġ stati kemm fi ħdan in-Nazzjonijiet Uniti kif ukoll fl-Unjoni Ewropea.

Iż-żewġ naħat qablu wkoll li jkomplu jsaħħu l-koperazzjoni bejniethom, b'mod partikolari permezz ta' inizjattivi fis-settur mediku u skambji kulturali.

Fi tmiem il-laqgħa, Mustafa appella lill-Unjoni Ewropea biex tipprovdi għajnuna ta' emerġenza lill-Palestina sabiex tkun tista' tiffaċċja l-kriżi finanzjarja kkawżata minn dħul miżmum u restrizzjonijiet bankarji.