Scaffolding jiġġarraf fi Triq il-Gżira waqt li beda jiżżarma

Scaffolding li kien qed jiġi żarmat iġġarraf fi Triq Reggie Miller, Gżira, il-Ġimgħa filgħodu, iżda ħadd ma weġġa’ fl-inċident.

L-inċident seħħ għall-ħabta tad-9:30am qrib l-Isptar Zammit Clapp. Il-Pulizija kkonfermat li ma kien hemm l-ebda persuna feruta.

Fuq il-post issejħu minnufih membri tad-Dipartiment tal-Protezzjoni Ċivili sabiex jassistu fis-sitwazzjoni.

Minħabba l-waqgħa tal-istruttura tal-metall, li spiċċat f’nofs it-triq, Triq Reggie Miller ingħalqet temporanjament għat-traffiku sakemm jitneħħa l-armar u s-sit jiġi assigurat.

Fuq il-post jinsabu wkoll uffiċjali mill-Awtorità għall-Bini u l-Kostruzzjoni (BCA), Transport Malta u l-Awtorità għas-Saħħa u s-Sigurtà fuq il-Post tax-Xogħol (OHSA), li qed jinvestigaw l-inċident.