Carmelo Abela elett Speaker tal-Kamra tad-Deputati
L-eks ministru Carmelo Abela ġie elett unanimament Speaker tal-Kamra tad-Deputati, filwaqt li d-deputat Nazzjonalista Bernard Grech inħatar Deputy Speaker
minn Jaelle Borg
Carmelo Abela ġie elett Speaker tal-Kamra tad-Deputati wara l-ftuħ uffiċjali tal-15-il leġiżlatura.
Abela ġie nnominat mill-Prim Ministru Robert Abela u approvat miż-żewġ naħat tal-Kamra qabel ħa l-ġurament tal-ħatra tiegħu nhar is-Sibt.
Fl-ewwel indirizz tiegħu lill-Kamra, Abela qal li r-rwol ta’ Speaker iġib miegħu responsabbiltà lejn il-Parlament u l-membri tiegħu, lejn il-Kostituzzjoni u fuq kollox lejn il-poplu li jagħti lil din l-istituzzjoni l-awtorità demokratika tagħha.
Huwa qal li l-fiduċja li ngħatatlu mhijiex biss fiduċja fil-persuna tiegħu, iżda wkoll fil-kariga li għandha tibqa’ ’l fuq mill-kontroversji politiċi ta’ kuljum u qrib il-prinċipji li jagħtu sens lill-ħajja parlamentari, fosthom ir-rispett, il-libertà tal-espressjoni, il-ġustizzja, il-verità u d-dinjità tal-bniedem.
Abela rringrazzja lill-membri parlamentari għall-fiduċja murija fih u sellem lill-eks Speaker Anglu Farrugia għas-servizz twil tiegħu fit-tmexxija tal-ħidma parlamentari matul l-aħħar snin.
Huwa rrikonoxxa wkoll il-kontribut tal-Ispeakers preċedenti, u qal li dawn kollha taw sehemhom biex il-Parlament Malti jkompli jissaħħaħ bħala istituzzjoni demokratika.
Dwar ir-rwol tal-Parlament, Abela qal li dan mhux biss il-post fejn issir il-politika, iżda wkoll fejn il-politika trid tiltaqa’ mar-responsabbiltà. Huwa sostna li filwaqt li l-Gvern għandu d-dritt u d-dmir li jwettaq il-programm li għalih ingħata l-fiduċja tal-poplu, l-Oppożizzjoni għandha wkoll id-dritt u d-dmir li tistaqsi, tikkritika u tisfida.
Is-Speaker il-ġdid esprima t-tama tiegħu li l-15-il leġiżlatura tkun waħda kkaratterizzata minn dibattitu serju, imġiba responsabbli u rispett reċiproku bejn il-membri parlamentari.
Huwa rringrazzja wkoll lill-uffiċjali u lill-ħaddiema tal-Parlament għax-xogħol tagħhom biex l-istituzzjoni tkompli taħdem b’mod effettiv.
Ftit wara l-elezzjoni tal-Ispeaker, il-Kamra għaddiet għall-ħatra tad-Deputy Speaker. Għall-kariga ġie nnominat id-deputat Nazzjonalista Bernard Grech, li wkoll kiseb l-appoġġ taż-żewġ naħat tal-Kamra.
Fl-intervent qasir tiegħu wara l-elezzjoni, Grech irringrazzja lill-Parlament, lill-Prim Ministru Robert Abela u lill-Kap tal-Oppożizzjoni Alex Borg għall-appoġġ tagħhom.
Huwa qal li jħares ’il quddiem biex ikompli jaħdem flimkien ma’ Carmelo Abela fit-tmexxija tal-ħidma parlamentari matul il-leġiżlatura l-ġdida.
