Daphne Caruana Galizia Foundation qajmet tħassib dwar il-ħatra ta’ Glenn Bedingfield bħala Ministru tal-Intern wara li inkjesta pubblika dwar il-qtil ta’ ġurnalista identifikatu bħala figura ewlenija f’kampanja ta' kritika fil-konfront ta' xogħolha.
Il-fondazzjoni qalet nhar il-Ħamis li l-inkjesta pubblika ta’ Caruana Galizia identifikat lil Bedingfield bħala figura politika li kellu rwol ċentrali fi sforz orkestrat sabiex ''tiġi deumanizzata'' Daphne Caruana Galizia u jiġi ''attakat il-leġittimita' tal-ġurnaliżmu tagħha'' waqt li kien qiegħed isservi fl-Uffiċċju tal-Prim Ministru.
Il-fondazzjoni enfasizzat sezzjoni mir-rapport tal-inkjesta li ddikjarat li "kien hemm elementi kemm fl-entitajiet tal-Istat kif ukoll b’mod partikolari fl-Uffiċċju tal-Prim Ministru li aġixxew b’mod attiv sabiex ixekklu lill-ġurnalista fix-xogħol tagħha u kkontribwew għal kampanja sostnuta b’mod organizzat".
Il-bord tal-inkjesta qal li l-kampanja sabet "l-aktar mezz qawwi tagħha fil-midja soċjali" u li "l-agħar espressjoni tagħha kienet il-blog li twaqqaf u tmexxa mill-Onorevoli Glenn Bedingfield li kien jokkupa pożizzjoni fl-Uffiċċju tal-Prim Ministru".
Il-fondazzjoni kkritikat ukoll ir-rekord tal-gvern fl-implimentazzjoni tar-rakkomandazzjonijiet tal-inkjesta, fejn argumentat li minn mindu ġie ppubblikat ir-rapport fl-2021, amministrazzjonijiet suċċessivi mmexxija minn Abela naqsu milli jwettqu r-riformi proposti mill-bord. Qalet li l-gvern "naqas milli jimplimenta r-rakkomandazzjonijiet tal-inkjesta pubblika u ostakola t-tentattivi internazzjonali u lokali kollha sabiex jappoġġja u jikkollabora ma' sforzi favur l-implimentazzjoni" ta’ dawk il-miżuri.
L-inkjesta pubblika dwar l-assassinju ta’ Caruana Galizia kkonkludiet li l-istat Malti ħoloq klima ta’ impunità li ffaċilitat iċ-ċirkostanzi li wasslu għall-qtil tagħha f’Ottubru 2017.
Il-fondazzjoni qalet li l-ħatra ta’ Bedingfield fil-portafoll tal-affarijiet interni tqajjem tħassib serju dwar l-impenn tal-gvern għas-sejbiet u r-rakkomandazzjonijiet tal-inkjesta.
.png)
