Mart il-Prim ministru Lydia Abela, flimkien ma’ bintha Giorgia Mae, ippreżentat donazzjoni ta’ €20,000 lil Puttinu Cares.
Il-fondi nġabru mill-attività Enchanted Easter, kif ukoll mill-bejgħ tal-figolli li sar minn Giorgia Mae.
Abela qalet li d-donazzjoni hija frott il-qlub kbar ta’ tant nies li pparteċipaw fl-inizjattiva, li flimkien jistgħu jagħmlu differenza fil-ħajjiet tal-familji li verament jeħtieġu appoġġ.
Hija rringrazzjat lil kull min kellu sehem fl-avveniment, kif ukoll lil Rennie u Angele għax-xogħol bla heda tagħhom, id-deduzzjoni, l-imħabba, u s-sens ta’ tama li jqanqlu fil-pazjenti u l-familji tagħhom.
F’isem Puttinu Cares, Rennie u Angele esprimew il-gratitudni tagħhom, filwaqt li enfasizzaw l-apprezzament tagħhom għall-appoġġ kontinwu li jirċievu.
Ikkonkludew li Puttinu Cares se jkompli jkun sors ta’ appoġġ għall-familji u l-pazjenti li jiddependu fuq l-għajnuna tagħhom fi żminijiet diffiċli.
L-inizjattiva Enchanted Easter saret avveniment annwali, li sena wara sena jgħaqqad flimkien familji, tfal, u voluntiera fi spirtu ta’ solidarjetà u ġenerożità.
Għalkemm iġib ferħ lil dawk li jipparteċipaw, l-avveniment jissarraf ukoll f’għajnuna għal organizzazzjoni li tagħmel tant għal tant familji.
