Żewġ sajjieda, il-ġimgħa l-oħra bil-lejl allegatament involuti f’inċident serju wara li wieħed minnhom laqat uffiċjal tal-infurzar b’karozza.
Skont filmati maqbuda mill-Malta Ranger Unit, ir-rangers kienu qed jagħmlu ronda mal-kosta bil-lejl meta nnutaw żewġ individwi b’spearguns deħlin fil-baħar qrib Wied Xaqqa.
Id-Dipartiment tas-Sajd ġie infurmat u ftit tal-ħin wara waslu żewġ uffiċjali fuq il-post, li avviċinaw lill-persuni hekk kif kienu qed jidħlu fil-vettura.
Wara argument, wieħed mill-irġiel allegatament ħataf is-speargun li kien ġie kkonfiskat u poġġieh fil-vettura tiegħu.
Ix-xufier ipprova jsuq minn mawdar l-uffiċjal, iżda meta ra li ma setax jgħaddi, allegatament saq direttament lejh u laqtu qabel ma ħarab minn fuq il-post.
L-uffiċjal ma ġarrab l-ebda ġrieħi.
Ir-rangers akkumpanjaw lill-uffiċjali sal-għassa tal-pulizija f’Birżebbuġa fejn sar rapport dwar il-każ.
L-akkużati allegaw li kienu qed jagħmlu “riċerka”, iżda r-rangers kellhom evidenza li kienu qed jużaw speargun, li sussegwentement instab moħbi ħdejn blata mill-uffiċjali.
F’Malta, is-spearfishing huwa permess biss matul il-ġurnata u b’liċenzja, filwaqt li huwa strettament ipprojbit bil-lejl. Min jikser il-liġi jista’ jiffaċċja multi kbar u konfiska tal-apparat mill-awtoritajiet.
Minbarra dan, il-persuni involuti jistgħu jiffaċċjaw akkużi kriminali relatati ma’ attakk fuq uffiċjal pubbliku u tfixkil tal-ġustizzja.
