L-Arċisqof ta’ Malta Charles Scicluna esprima tħassib serju dwar dak li sejjaħ bħala attakk “inġustifikabbli” fuq il-Papa Leo XIV mill-President Amerikan Donald Trump.
Fi stqarrija, l-Arċisqof qal li wassal it-tħassib tiegħu lill-Ambaxxatur Amerikan għal Malta, filwaqt li sostna li l-Knisja f’Malta tinsab mal-Papa.
Huwa sostna li Leo XIV tkellem “b’sens profond ta’ umanità” meta appella lill-mexxejja dinjija biex “jisimgħu l-ilħna tat-tfal” li ħajjithom inbidlet b’mod irriversibbli minħabba azzjonijiet li “xi adulti ftaħru bihom”.
Fi stqarrija maħruġa mill-Kurja nhar it-Tnejn, intqal li l-Papa reġa’ afferma l-pożizzjoni konsistenti tal-Knisja tul l-istorja, filwaqt li ġiet enfasizzata l-importanza tal-paċi u l-ġustizzja.
L-Arċisqof irrefera wkoll għal kliem il-Papa fejn qal: “Il-gwerra taqsam; it-tama tgħaqqad. L-arroganza tgħaffeġ lill-oħrajn; l-imħabba ttellagħhom. L-idolatrija tagħmi; Alla ħaj jdawwal.”
Intant, tliet kardinali Amerikani esprimew ukoll it-tħassib tagħhom dwar l-imġiba tal-President, f’intervista rari ma’ CBS, fejn l-Arċisqof ta’ Washington iddeskriva l-kunflitt bħala “gwerra ta’ għażla” u “inġusta”.
Dan kollu seħħ wara diskors li għamel il-Papa fil-Vatikan, fejn appella għall-paċi u ddeskriva theddid ta’ qerda ta’ “ċiviltà sħiħa” bħala “totalment inaċċettabbli”.
F’reazzjoni, Trump attakka lill-Papa f’post twil fuq Truth Social, fejn sejjaħlu “dgħajjef” u “terribbli”, u allega li ġie elett Papa minħabba fih.
“Li kieku ma kontx jien fil-White House, Leo ma kienx ikun fil-Vatikan,” qal Trump, filwaqt li żied li l-Papa għandu jkun grat lejh.
Minkejja dawn l-attakki, il-Papa Leo XIV qal li se jkompli jitkellem kontra l-gwerra bejn l-Istati Uniti u l-Iżrael kontra l-Iran, filwaqt li sostna li m’għandux interess jidħol f’dibattitu mal-President Amerikan.
