Momentum esprima l-appoġġ sħiħ tiegħu għal petizzjoni parlamentari li titlob il-protezzjoni ta’ waħda mill-aħħar żoni agrikoli mhux żviluppati li fadal fis-Swatar.
Momentum appella lill-awtoritajiet sabiex jisimgħu lir-residenti u jaġixxu b’mod deċiżiv biex jippreservaw din l-art għall-ġenerazzjonijiet preżenti u futuri.
“Ġimgħa oħra, petizzjoni parlamentari oħra biex issalva l-aħħar parti naturali ta’ wied żviluppat iżżejjed,” qal Momentum.
Is-sit, li huwa daqs 17-il grawnd tal-futbol, jinsab wara l-Kulleġġ ta’ San Martin fl-Imsida u huwa art agrikola fil-biċċa l-kbira mhux użata. Ġie miżjud maż-żona ta’ żvilupp fl-eżerċizzju ta’ razzjonalizzazzjoni tal-2006.
L-art għandha rwol ambjentali vitali billi tassorbi b’mod naturali l-ilma tax-xita li joħroġ, li jnaqqas ir-riskji ta’ għargħar fiż-żoni tal-madwar, partikolarment fl-Imsida. L-iżvilupp tagħha jneħħi wieħed mill-aħħar buffers naturali tal-lokalità kontra impatti bħal dawn.
L-iżviluppaturi qegħdin jinsistu fuq għoli tal-bini ta’ 22 metru, l-ekwivalenti ta’ seba’ sulari, fuq is-sit massiv fis-Swatar.
“Ladarba dawn l-ispazji ħodor miftuħa jintilfu minħabba l-iżvilupp, ikunu spiċċaw għal dejjem,” qal il-kandidat tad-9 Distrett ta’ Momentum, Matthew Agius.
Il-petizzjoni, bit-titlu Nippreservaw l-Art Verġni ta’ Swatar għall-Ġenerazzjonijiet Preżenti u Futuri, tħeġġeġ lill-parlament biex jintervjeni sabiex l-applikazzjonijiet kontinwi għall-kontroll tal-ippjanar jiġu miċħuda, u b’hekk jiġi żgurat li din l-art tibqa’ protetta u ppreservata bħala spazju aħdar miftuħ.
“Ir-residenti qed jirrealizzaw li l-membri parlamentari tal-Partit Nazzjonalista u tal-Partit Laburista qgeħdin jevitaw li jagħmlu dak li hu meħtieġ,” qal il-President ta’ Momentum, Arnold Cassola. “Minflok, ir-residenti qed ikollhom jirrikorru għal petizzjoni parlamentari biex isalvaw dak li fadal.”
Momentum ħeġġeġ lill-pubbliku biex jiffirma l-petizzjoni sabiex isalva waħda mill-aħħar żoni ħodor ta’ Swatar.
.png)
