Il-Parlament Ewropew approva direttiva ġdida kontra l-korruzzjoni li se tintroduċi standards komuni madwar l-istati membri kollha tal-Unjoni Ewropea.
Il-leġiżlazzjoni għandha l-għan li tarmonizza r-reati kriminali relatati ma’ tixħim, approprjazzjoni indebita u abbuż ta’ poter, filwaqt li tistabbilixxi wkoll regoli vinkolanti dwar il-pieni u l-perjodi ta’ preskrizzjoni. Parti mid-direttiva tinkludi wkoll miżuri ta’ prevenzjoni li jobbligaw lill-pajjiżi membri jieħdu azzjoni konkreta biex jiġġieldu l-korruzzjoni.
B’dan il-pass, l-istati membri tal-UE se jkollhom jaġġornaw il-liġijiet nazzjonali tagħhom biex jinkludu dispożizzjonijiet aktar ċari dwar l-abbuż ta’ funzjonijiet pubbliċi.
Id-direttiva tħabbret mill-Membru Parlamentari Ewropew David Casa, li kien in-negozjatur ewlieni f’isem il-European People's Party.
Casa qal li din il-miżura tipprovdi lill-European Commission b’għodda konkreta biex tivvaluta kif l-istati membri qed jindirizzaw il-korruzzjoni, u saħaq li din hija kwistjoni ċentrali marbuta mas-saltna tad-dritt.
L-inizjattiva Ewropea ġiet imsaħħa wkoll minn stħarriġ tal-Eurobarometer, li wera li 69% taċ-ċittadini Ewropej jemmnu li l-korruzzjoni hija mifruxa f’pajjiżhom. F’Malta, il-perċezzjoni hija ogħla, b’95% tan-nies fl-2024 li qalu li jqisu l-korruzzjoni bħala problema mifruxa, meta mqabbel ma’ 92% fl-2023.
Minkejja reżistenza mill-Council of the European Union, id-direttiva ġiet approvata. Casa qal li dan il-vot jibgħat messaġġ ċar li l-korruzzjoni mhix aċċettabbli u li m’għandhiex tiġi tollerata.
Huwa rrefera wkoll għall-inkjesta pubblika dwar il-qtil tal-ġurnalista Daphne Caruana Galizia, li kienet irrakkomandat li jiġu introdotti liġijiet kontra l-abbuż ta’ poter. Skontu, dawn ir-rakkomandazzjonijiet ma ġewx implimentati kif suppost, iżda issa, bid-direttiva Ewropea, il-gvernijiet se jkunu obbligati jieħdu passi konkreti.
Casa temm jgħid li l-enfasi issa għandha tkun fuq l-implimentazzjoni effettiva tad-direttiva fil-liġijiet nazzjonali. Huwa appella lill-politiċi, b’mod partikolari f’Malta, biex imorru lil hinn mill-minimu meħtieġ sabiex jerġgħu jibnu l-fiduċja tal-pubbliku fl-istituzzjonijiet politiċi.
