Il-Membru Parlamentari Ewropew Laburista Daniel Attard iddefenda l-pożizzjoni tiegħu dwar il-kunflitt marbut mal-Iran wara kritika qawwija minn Sammy Meilaq, trade unionist irtirat, li akkużah li “qed jigdeb”.
Il-kritika saret waqt protesta kontra l-gwerra fl-Iran li saret is-Sibt li għadda quddiem l-ambaxxata tal-Istati Uniti. Waqt id-dimostrazzjoni, Meilaq ikkontesta kummenti li Attard kien ta lill-BBC fejn qal li r-reġim Iranjan huwa “l-għerq tal-kunflitt”.
“Qed tigdeb. L-għerq veru tal-problema jmur lura 70 sena,” qal Meilaq lill-protestanti, filwaqt li akkuża lil Attard li mhux “Laburist veru”.
Meilaq kien qed jirreferi għall-operazzjonijiet sigrieti tal-Istati Uniti u r-Renju Unit fl-1953 li wasslu għat-tneħħija tal-Prim Ministru Iranjan elett demokratikament, Mohammad Mossadegh. Mossadegh kien nazzjonalizza l-industrija taż-żejt, li sa dak iż-żmien kienet taħt kontroll ta’ interessi Brittaniċi.
Wara dak l-iżvilupp, Mohammad Reza Pahlavi kien installat bħala monarka assolut u baqa’ fil-poter sal-1979, meta r-Rivoluzzjoni Iżlamika waqqgħetu u stabbiliet ir-reġim teokratiku li għadu jmexxi lill-Iran illum.
F’artiklu ppubblikat illum, Attard qal li l-politika internazzjonali “rari toffri l-kumdità ta’ binarji morali sempliċi”, f’dik li tidher bħala risposta diretta għall-interpretazzjoni ta’ Meilaq tal-kunflitt.
Attard, li huwa membru tad-delegazzjoni tal-Parlament Ewropew responsabbli mir-relazzjonijiet mal-Iran, qal li l-fehma tiegħu hija influwenzata wkoll mill-kuntatt li għandu mad-dijaspora Iranjana.
“Huma joħolmu b’futur differenti. Iridu l-libertà. Iridu d-dinjità. Iridu jibnu futur modern,” qal.
Fl-istess waqt, Attard esprima tħassib dwar dak li sejjaħ l-imprevedibbiltà tal-president Amerikan u n-nuqqas ta’ strateġija ċara dwar l-Iran. Madankollu, huwa sostna li jekk il-kunflitt iwassal għal bidla fir-reġim, dan jista’ jagħti lill-poplu Iranjan opportunità biex jesperjenza aktar libertà.
Attard saħaq li d-dinja “mhijiex maqsuma f’eroj u villains li jaġixxu waħedhom”, iżda hija ffurmata minn “xibka kumplessa ta’ grievi storiċi, interessi strateġiċi, kunflitti ideoloġiċi u tbatija umana”.
“Jekk irridu verament nindirizzaw il-kriżijiet globali, irridu nirreżistu t-tentazzjoni li nissimplifikawhom iżżejjed,” temm jgħid.
.png)
