Filmat | Operazzjoni mill-Pulizija fil-Furjana ... raġel arrestat b'rabta mal-qtil doppju f'Tas Sliema

Ir-raġel huwa magħruf mal-pulizija fuq numru ta' serqiet oħrajn

Ir-raġel Albaniż arrestat  - mejus suspettat ewlieni fil-qtil doppju f'Tas Sliema
Ir-raġel Albaniż arrestat - mejus suspettat ewlieni fil-qtil doppju f'Tas Sliema

Il-Pulizija għadha kif arrestat raġel Albaniż ta' 23 sena li kien qiegħed jgħix f'dar - f'kundizzjoni xejn tajba - fil-Furjana u li jidher illi huwa s-suspettat ewlieni fil-qtil doppju f'Tas-Sliema l-ġimgħa l-oħra.  Dan l-Albaniż huwa magħruf mal-pulizija fuq numru ta' serqiet oħrajn f'pajjiżna u persuna meqjusa wkoll bħala "perikoluża ħafna."

Jidher illi fil-proprjetà nstabet ukoll l-arma li ntużat fil-qtil tal-ġimgħa l-oħra. 

Kelliem għall-Korp tal-Pulizija ikkonferma li saru l-arresti iżda qal li aktar informazzjoni se tkun qed tingħata fil-ħin li ġej.

Il-qtil doppju ta' Christian Pandolfino u tas-sieħeb tiegħu Ivor Maciejowski seħħ il-ġimgħa l-oħra fid-dar ta' dawn iż-żewġ persuni f'Tas-Sliema.  Tiri nstemgħu ġejjin mid-dar għall-ħabta tal-10:30 p.m., bil-pulizija jsibu lill-koppja f'għadira demm - wieħed fis-sular ta' isfel u l-ieħor fis-sular ta' fuq tad-dar.  Ma' l-ewwel sigħat kienu diġa' nġabru filmati CCTV li kienu juru lil tlett irġiel jaħarbu minn fuq il-post b'basket f'idejhom f'karozza bajda. 

Il-karozza, misruqa bi pjanċa misruqa wkoll, hija tat-tip VW Tiguan u nstabet fl-aħħar sigħat.  Irriżulta li din kienet nsterqet sentejn ilu mill-istess ċirku ta' kriminali. 

Sa issa għadu mhux ċar x'seta' kien il-mottiv:  Jekk hux serqa mid-dar li kien magħruf illi kellha ħafna oġġetti ta' valur - inkluż dehebijiet - jew kienx att ta' vendetta kontra l-istess koppja.  Pandolfino kien jaħdem fil-qasam finanzjarju u tal-banek, filwaqt li Maciejowski kien kollettur tal-arti. 

More in Kronaka