Il-pulizija Taljana arrestaw Marokkin b'suspett li kien parti mill-attakk fuq il-Mużew Nazzjonali ta' Bardo f'Tuneż - f'liema attakk inqatlu 21 turist f'Marzu li għadda.
Il-Marokkin ġie arrestat mill-pulizija anti-terrorista tal-Italja. Il-mezzi tax-xandir Taljani rrapurtaw li raġel ta' 22 sena ġie arrestat fir-raħal ta' Gaggiano, 8 mili 'l bogħod minn Milan.
Il-gazzetta Taljana La Reppublica qed tirraporta kif Touil Abdel Majid, it-terrorista maqbud f'Milan, kien ġie espuls minn Agrigento fis-17 ta' Frar. Wara dan il-perjodu kienu ntilfu t-traċċi tiegħu kollha. Huwa kien wasal fl-Italja permezz ta' dgħajsa, fost 90 immigrant ieħor - fejn kien ingħata provediment ta' espulsjoni.
L-investigaturi qed jgħidu li Majid kien il-moħħ wara t-tfassil u t-twettieq tal-attakk terroristiku f'Bardo - wara liema attakk mar lura l-Italja bħala immigrant irregolari.
L-attakk f'Bardo seħħ fit-18 ta' Marzu, fejn inqatlu total ta' 22 persuna b'kollox, inkluż pulizija Tuneżin.
Żewġ terroristi Tuneżini ġew maqtula permezz ta' tir fuq ix-xena stess, wara li żammew ostaġġi fil-mużew.
Il-President tat-Tuneżija Beji Caid Essebsi, qal li kien għad fadal terrorista li għad irid jinqabad.
