Il-President Amerikan Donald Trump qed jiffaċċja mument deċiżiv hekk kif l-ultimatum tiegħu lill-Iran jasal fi tmiemu, filwaqt li jiżdiedu l-attakki militari u jitnaqqsu ċ-ċansijiet għal soluzzjoni diplomatika.
L-iskadenza imposta mill-President Amerikan Donald Trump, li hedded “qerda totali” tal-Iran jekk ma terġax tinfetaħ l-Istrett ta’ Hormuz, tagħlaq nhar l-Erbgħa fis-2am ħin ta’ Malta, hekk kif it-tensjonijiet fir-reġjun qed jilħqu livell perikoluż.
Fl-istess waqt, Iżrael ħareġ twissija drastika lejn il-popolazzjoni Iranjana, fejn qal li n-netwerk kollu tal-ferroviji jista’ jkun fil-mira ta’ attakki u ħeġġeġ liċ-ċivili biex jevitaw l-użu tiegħu, billi sostna li dan “jipperikola ħajjithom”.
F’post fuq il-pjattaforma Truth Social waqt Ħadd il-Għid, Trump kiteb messaġġ provokattiv fejn hedded lill-Iran b’attakki fuq infrastruttura ewlenija, inklużi impjanti tal-enerġija u pontijiet, filwaqt li talab li l-Istrett jinfetaħ immedjatament.
Min-naħa tiegħu, il-militar Iranjan iddeskriva dawn it-theddid bħala “delużjonali”, u qal li ma jistgħux jaħbu “l-umiljazzjoni” tal-Istati Uniti fir-reġjun.
Matul il-weekend, ġiet proposta pjan ta’ paċi f’żewġ stadji, iffaċilitat minn Pakistan u medjaturi oħra. Madankollu, l-Iran irrifjuta proposta ta’ waqfien mill-ġlied ta’ 45 jum, u sostna li qed jitlob tmiem permanenti tal-kunflitt. Trump qal li r-risposta kienet “sinifikanti” iżda “mhux biżżejjed”.
Il-President Amerikan żied jgħid li “mhu xejn imħasseb” dwar allegazzjonijiet ta’ reati tal-gwerra, u sostna li “arma nukleari hija r-reat veru”, minkejja li l-Istati Uniti għandhom wieħed mill-akbar arsenali nukleari fid-dinja.
Il-kummenti tiegħu qanqlu reazzjonijiet qawwija ġewwa l-Istati Uniti, fejn membri tal-Kungress qed jitolbu li jitneħħa mill-kariga taħt il-25 Emenda. Il-Kungressista minn Arizona Yassamin Ansari akkużat lil Trump li qed “jeskala gwerra illegali u devastanti”, filwaqt li l-Kungressista minn New Mexico Melanie Stansbury qalet li “il-Kungress u l-kabinett għandhom jaġixxu”.
Intant, l-attakki konġunti tal-Istati Uniti u Iżrael fl-Iran ħallew mill-inqas 34 mejta nhar it-Tnejn, hekk kif missili u drones Iranjani komplew jolqtu miri f’pajjiżi tal-Golf.
Fil-Gaza Strip, attakk mill-ajru Iżraeljan qatel mill-inqas 10 persuni qrib skola li kienet qed toffri kenn lil persuni spostati, filwaqt li attakki oħra matul il-lejl ħallew mill-inqas 15-il vittma oħra.
Is-sitwazzjoni umanitarja kompliet tiggrava meta l-World Health Organization issospendiet evakwazzjonijiet mediċi minn Gaza lejn l-Eġittu permezz ta’ Rafah, wara li ħaddiem tagħha nqatel f’attakk nhar it-Tnejn.
Bl-iskadenza imminenti u l-vjolenza li qed teskala, il-komunità internazzjonali qed tħares lejn żviluppi li jistgħu jiddefinixxu l-futur immedjat tar-reġjun.
.png)
.jpg)
