L-eks Ministru Nazzjonalista Louis Galea ma ċaħadx dak li żvelat il-gazzetta ILLUM, jiġifieri li qed jipproponi isem ġdid għall-Partit Nazzjonalista, biex jibda jissejjaħ: “Partit Nazzjonali tal-Poplu.”
Fi stqarrija, Galea saħaq li l-bidla fl-isem mhijiex kollox u kkwota titlu ieħor tas-sit illum.com.mt, jiġifieri li r-riforma meħtieġa fil-PN hija ħafna akbar mill-bidla fl-isem.
Kif żvelat il-gazzetta ILLUM ukoll, Galea insista li l-proposti li qed jipproponi huma “sostanzjali.” Fi kliemu: “kieku kellhom jiġu aċċettati u implimentati tajjeb inħossni fiduċjuż li jagħtu ħajja ġdida lill-partit.”
Galea spjega kif fit-tieni ġimgħa ta’ Jannar huwa tkellem mad-Deputati kollha u ppreżenta u ddiskuta l-proposti fi tliet sezzjonijiet twal.
“Numru sew mis-suġġerimenti tal-MPs ġew inkorporati fil-proposti. Issa jmiss li d-diskussjoni tgħaddi fi ħdan il-Kumitat Eżekuttiv, imbagħad fl-Assembleji tal-Kunsilliera, biex wara tiġi deċiża fil-Kunsill Ġenerali,” spjega Galea.
Spjega kif bħala parti mill-ħidma tiegħu, issottometta proposti dwar
- “ħidma aktar effettiva mill-Grupp Parlamentari;
- riformi meħtieġa b’mod urġenti fil-qafas istituzzjonali u politiku biex pajjiżna jirritorna għat-triq ta’ demokrazija sħiħa u governanza tajba;
- aġġornament tal-Istqarrija tal-Missjoni tal-partit li tipprovdi l-bażi għall-aġġornament tal-ħsieb u l-politika tal-partit; u
- tibdil bl-iskop li l-partit jiġi riorganizzat madwar struttura politika demokratika u effettiva li taħdem permezz ta' tim f'kull livell."
Fil-fatt, Galea qiegħed jipproponi abbozz li jaġġorna l-istatut tal-Partit Nazzjonalista u dan wara diversi diskussjonijiet li kellu.
“Barra minn hekk analizzajt il-kwestjonarju li mlew il-Kumitati Lokali dwar x’jaħsbu li l-partit għandu jagħmel biex jiġġedded, jissaħħaħ u jsir għodda aktar effettiva għall-ġid tal-poplu. Analizzajt ukoll numru konsiderevoli ta’ papers jew rapporti li diversi individwi ġentilment għoġobhom jibgħatuli,” insista Galea.
Temm jgħid li l-proposti li ssottomettejt jien fil-ġimgħat li għaddew huma frott ta’ dan il-proċess ta’ dawn id- diskussjonijiet u riflessjonijiet.