100 immigrant instabu jgħixu fi stalel fil-Marsa f'kundizzjonijiet ħżiena iktar kmieni dalgħodu.
L-immigranti instabu wara operazzjoni tal-pulizija assistita mir-Rapid Intervention Unit.
Din mhix l-ewwel darba li nstabu immigranti jgħixu f'kundizzjonijiet ħżiena ħafna, bl-aħħar sejba tkun f'razzett fi Sqaq Awżara fil-limiti ta' Ħal Qormi. Hemmhekk kienu nstabu 100 persuna oħra tgħix f'dan ir-razzett li fih, suppost kienu jinżammu l-baqar.
F'messaġġ fuq il-midja soċjali il-Kap Eżekuttiv tal-Awtorità tal-Ippjanar Johann Buttigieg qal illi erba' immigranti kienu jgħixu fi spazju ta' bejn seba' u disa' metri kwadri ta' kamra tas-sodda filwaqt illi 12-il immigrant kienu qed jgħixu fis-"salott" f'daqs ta' 20 metru kwadru.
L-immigranti kienu lkoll meħuda fil-Kwartieri Ġenrali tal-Pulizija fil-Furjana fejn se jkunu interrogati.