141 immigrant se jitniżżlu Malta...se jitqassmu kollha f'pajjiżi oħra
Malta taċċetta li żżomm 54 immigrant minn dawk li ġew salvati lbieraħ
More in Politika
Malta taċċetta li żżomm 54 immigrant minn dawk li ġew salvati lbieraħ
Il-Gvern Malti wara diskussjonijiet ma' Franza aċċetta li jiddaħħlu f'Malta l-141 immigrant abbord il-bastiment Aquarius wara li kien assigurat li l-immigranti kollha se jitqassmu fost ħames pajjiżi oħra tal-Unjoni Ewropea.
Dawn il-pajjiżi huma Franza, il-Ġermanja, il-Lussemburgu, il-Portugal u Spanja, bl-Italja tidher li żammet soda fil-pożizzjoni tagħha u ma taċċetta xejn.
Intant, il-Gvern Malti fi stqarrija ħabbar li se jkun qed iżomm 54 immigrant mill-114 li lbieraħ ġew salvati mill-Forzi Armati. Is-60 l-oħra se jkunu qed jitqassmu fi stati membri oħra.
Il-Gvern fakkar ukoll li din kienet it-tieni darba li ddaħħal fis-seħħ dan il-mekkaniżmu volontarju meta Malta kienet aċċettat il-bastiment Lifeline wara li assigurat li pajjiżi oħra membri jgħinuha terfa' l-piż u jieħdu wħud mill-immigranti.
"Il-Gvern Malti jikkunsidra dan bħala eżaempju konkret ta' tmexxija Ewropea u ta' solidarjetà," ittemm tgħid l-istqarrija.
Fi Tweets differenti, il-Prim Ministru Joseph Muscat qal li Malta aċċettat li tilqa' dawn l-immigranti minkejja li ma kellha l-ebda obbligazzjoni legali li tagħmel dan. Huwa rringrazzja wkoll lill-President Franċiż Emmanuel Macron u saħaq li Malta u Franza qablu dwar triq 'il quddiem għall-immigrazzjoni.
#Malta will give #Aquarius permission to enter its ports, despite having no legal obligation to do so. All reported 141 persons on board will be distributed amongst #France, #Germany, #Luxembourg, #Portugal and #Spain. More to follow.
— Joseph Muscat (@JosephMuscat_JM) August 14, 2018
Intant, il-ġimgħa li għaddiet, Amnesty International ma tantx kellha kliem pożittiv għal Malta u l-Italja.
Fost oħrajn, fir-rapport ‘Between the Devil and the deep blue sea’, Amnesty International tfakkar illi minħabba li Malta ma rratifikatx l-emendi tal-Konvenzjoni għas-Sigurtà fuq il-Baħar (SOLAS) fl-2004, l-Italja u Malta huma marbutin b’verżjonijiet differenti tal-istess konvenzjoni.
Ikkritikat l-aktar lil Malta fid-dawl tad-deċiżjoni li ħadet fuq il-bastiment Sarost 5 meta rrifjutat li ddaħħal għandha 40 immigrant u dan minkejja li temmen li l-immigranti għandhom jidħlu fl-iktar port sigur u mhux fil-port tal-pajjiż fiż-żona ta’ salvataġġ (SAR) li jkunu fiha. Kien għalhekk li insistiet li f'dan il-każ, Malta “falliet”.