Intervista Lokali Barranin

Bilanċ assolut bejn Tarxien R. u St Andrews

Tarxien R.....................1    St Andrews...................1

Cristian Muscat / 3 ta' Diċembru 2016 16:18
Azzjoni mil-logħba li rat bilanċ bejn it-timijiet | ritratt: Christine Borg
Tarxien R. - Cassar, Galea (Brincat 90'), De Leon Garcia (Micallef 76'), Nilsson, Marcelina, Fernandez Prendes, Baker, Da Paixao Alves, Zammit, Zammit, Borg (Agius 60')

St Andrews - Galea, Pena Beltre, Bakmaz, Camilleri, Che Bong Won, Farrugia, McKay (Walker 83'), Udoh (Belacevic 63'), Kastrevec (Darmanin 63'), Paz, Nwoko

Referi - Malcolm Spiteri

Fil-konfront bejn Tarxien Rainbows u St Andrews irrenja bilanċ assolut hekk kif dawn iż-żewġ timijiet temmew il-konfront ta' bejniethom fi draw ta' 1-1.

Tarxien Rainbows fetħu l-iskor fid-19-il minuta meta Alex Da Paixao Alves avvanza tajjeb qabel xeħet cross perfett lejn Emersom Marcelina li min-naħa tiegħu ndirizza l-ballun permezz ta' daqqa ta' ras lejn Julian Galea, li baqa' dieħel fil-kaxxa u permezz ta' xutt fil-baxx tefa' l-ballun wara l-goalkeeper żagħżugħ ta' St Andrews, Jake Galea.

St Andrews irrispondew fit-32 minuta permezz ta' xutt minn barra l-kaxxa ta' Kyrian Nwoko li ntemm barra. Sitt minuti wara, is-Saints kienu sfortunati li ma ġabux l-iskor indaqs meta minn cross minn fuq ix-xellug, għola tajjeb Ziga Kastrevec li iżda ra t-tentattiv tiegħu minn daqqa ta' ras jintemm ftit għoli mil-lasti tal-goalkeeper tar-Rainbows, Andrea Cassar.

Kien biss fil-65 minuta li ġiet innutata l-ewwel azzjoni denja ta' nota fit-tieni taqsima meta Alex Da Paixao Alves xeħet cross tajjeb lejn Daniel Ponce De Leon Garcia li minn quddiem Jake Galea naqas milli jagħmel kuntatt mal-ballun.

St Andrews irrispondew fil-75 minuta meta Dale Camilleri kellu xutt minn tarf il-kaxxa li għadda għoli. Fil-81 minuta St Andrews rebħu penalti meta Matthew Tabone waqqa' lil Ivan Paz fil-kaxxa. Mill-11-il metru nkariga ruħu l-captain Joseph Farrugia li iżda ra t-tentattiv tiegħu jistampa mal-mimduda. Fid-90 minuta, St Andrews skorjaw gowl drammatiku biex ġabu l-iskor indaqs permezz ta' xutt imdawwar minn minn barra l-kaxxa ta' Enmy Manuel Pena Beltre.

Cristian Antony Muscat huwa ġurnalist sportiv li jispeċjalizza fil-futbol. Ilu f’dan il-qasam għal dawn l-aħħar 5 snin. Kien kummentatur f'diversi logħbiet prinċipali tal-futbol fosthom dawk mill-UEFA Champions League kif ukoll tal-waterpolo, handball u futsal. Għandu għal qalbu ħafna l-isports hekk kif jarah bħala mezz ewlieni li jgħin lill-bniedem biex jiskopri dejjem iktar lilu nnifsu.
Stħarriġ
Segwina fuq Facebook