Il-Malta Pool Association tagħlaq is-26 staġun bil-preżentazzjoni tal-unuri
Il-Malta Pool Association għalqet is-26 staġun tagħha bil-preżentazzjoni tal-unuri kollha mirbuħa matul l-istaġun. F’dan l-istaġun l-assoċjazzjoni kellha mhux anqas minn 50 tim jieħu sehem fil-kampjonati tagħha kif ukoll 500 plejer attivi fil-kompetizzjonijiet matul l-istaġun.
Ħamrun Liberty iddominaw billi rebħu l-Kampjonat Premier Logografix, Maltasightseeing Team Knockout, Delicata Easter Cup Tournament kif ukoll is-Super Cup. The Venue Bar Żurrieq rebħu l-kampjonati tal-Ewwel Diviżjoni filwaqt li Ian’s Sports Club kisbu r-rebħ tat-Tieni Diviżjoni. Qormi Football Ground irritornaw fi ħdan l-għaqda u rebħu l-kampjonati tat-Tielet Diviżjoni. Il-kompetizzjoni knockout riservata għat-timijiet tat-Tieni u t-Tielet Diviżjoni ġiet mirbuħa minn Espadon Bar.
Fil-kampjonati individwali Clayton Attard kiseb it-titlu nazzjonali filwaqt li Scott Muscat, Troy Zammit u Alfred Attard rebħu l-kategoriji Under 18’s, Under 21 u Over 50’s rispettivament.
Matul is-serata ġew ippremjati bosta plejers oħra li rebħu ranking tournaments matul l-istaġun.