Ħames Minuti Intervisti Divertiment Teatru Arti

Tfal Pollakki b'diżabilità jingħataw iċ-ċans li jdoqqu u jidderieġu orkestra Maltija

Is-St Paul Chamber Ensemble ħadet sehem f'sensiela ta’ kunċerti ġewwa l-Polonja bħala parti miċ-ċelebrazzjonijiet tal-100 Anniversarju tal-Indipendenza Pollakka u l-100 Anniversarju

Yendrick Cioffi / 29 ta' Novembru 2018 10:39
Ritratt | Ian Noel Pace
Bejn l-4 u l-10 ta’ Novembru li għaddew, is-St Paul Chamber Ensemble, taħt id-direzzjoni ta’ Mro Mark Agius bdew sensiela ta’ kunċerti ġewwa l-Polonja bħala parti miċ-ċelebrazzjonijiet tal-100 Anniversarju tal-Indipendenza Pollakka u l-100 Anniversarju tar-Revoluzzjoni tal-Gran Polonja.

Dan it-tour sar fuq l-inizjattiva tal-Ambaxxata Maltija f'Varsavja, b'kollaborazzjoni mal-Iskola għall-Istudenti bi Bżonnijiet Speċjali f'Slupia, l-Assoċjazzjoni Apertus, il-parroċċa ta' San Pio di Pietrelcina, f’Poznan u l-Medina Foundation for Music li l-orkestra tagħmel parti minnha.

Fost l-attivitajiet, l-orkestra ħadet sehem f’workshop orkestrali għal studenti bi bżonnijiet speċjali fl-Iskola għall-istudenti bi Bżonnijiet Speċjali f'Slupia. Hawnhekk l-orkestra daqqet selezzjoni ta' xogħlijiet minn musicals u films, fejn ġew spjegati l-familji varji ta' strumenti li jikkostitwixxu l-orkestra. Matul il-prestazzjoni, l-istudenti kollha ngħataw l-opportunità li jipparteċipaw billi jdoqqu l-istrumenti, jingħaqdu mas-sezzjoni tal-perkussjoni u anki jidderiegu l-orkestra.

Apparti minn hekk, it-tour kien jinkludi tliet recitals orkestrali, tnejn minnhom fil-Knisja ta' San Martin f'Kepno u fil-Knisja Parrokkjali ta' San Padre Pio di Pietralcina f'Poznan rispettivament, fejn ittella’ x-xogħol l-aktar reċenti ta' Mro Agius, il-'Messa da Requiem.'

Dan ix-xogħol orkestrali u vokali, li oriġinarjament kien imtella' fil-Konkatidral ta' San Ġwann f'Marzu li għadda, kien milqugħ tajjeb ħafna tant li l-Ambaxxatur ta' Malta fil-Polonja, Dr John Paul Grech faħħar lil Mro Agius għall-intensità emozzjonali tal-kompożizzjoni u l-interpretazzjoni sensittiva tiegħu mill-orkestra, kor u solisti.

B'kollaborazzjoni mal-Kor 'Rotondo ta' Poznan,' It-tielet kunċert kien wieħed ta' Mużika Sagra fiċ-Ċentru tal-Arti u l-Kultura ta' Kalisz. It-tliet eżekuzzjonijiet li kienu ta' kalibru għoli ferm intemmu bl-udjenza apprezzattiva fuq saqajha f’applawsi twal t’apprezzament.

Dan it-tour kien il-quċċata tal-proġett konġunt, Kunċert ta 'Kanzunetta Patrijottika, li kien qed jiġi organizzat mill-Assoċjazzjoni Apertus, u l-Zespół Szkół Specjalnych w Słupi pod Kępnem.

Ritratti | Ian Noel Pace
Tagħtif dwar l-orkestra u t-tour

Imwaqqfa fl-2015 taħt id-direzzjoni ta' Mro Agius, is-St Paul Chamber Ensemble, li tgħaqqad flimkien xi wħud mill-aħjar mużiċisti u kantanti li l-gżira tagħna għandha x’toffri, stabbilixxiet ruħha bħala waħda mill-orkestri prominenti f’pajjizna. B'numru ta' prestazzjonijiet prestiġjużi, ir-repertorju tal-orkestra jinkludi xogħlijiet ta' kompożituri klassiċi kif ukoll xogħlijiet kontemporanji u xogħlijiet minn kompożituri Maltin u jvarja minn xogħlijiet sagri għal siltiet leggeri minn musicals u films.

Mal-orkestra ta’ erbgħa u erbgħin biċċa ħadu sehem Karen Gatt Darmenia (sopran), Miriam Camilleri (soprano mezzo), Joseph Aquilina (tenur) u Louis Andrew Cassar (baritonu).

Matul iż-żjara tagħhom, l-orkestra kienet appoġġjata minn backline effiċjenti u professjonali ħafna li ħa hsieb it-trasport tal-istrumenti l-kbar u l-armar u ż-żarmar tat-tagħmir fil-postijiet rispettivi. L-erba' programmi ġew imxandra live fuq il-midja soċjali u ngħatat kopertura estensiva fuq l-istazzjon tat-TV lokali Radio Sud.

Il-parteċipazzjoni tal-orkestra f'dawn iċ-ċelebrazzjonijiet kienet parzjalment iddettata mill-fatt li Valletta hija l-Belt Kapitali għall-Kultura tal-2018. L-inizjattiva kienet appoġġjata mill-Kunsill Malti għall-Arti, il-Ministeru għall-Affarijiet Barranin u l-Promozzjoni Kummerċjali, l-Awtorità tat-Turiżmu ta 'Malta, il-Kurja ta’ Malta u l-Fondazzjoni Valletta 18.

Ritratti | Ian Noel Pace
Stħarriġ
Segwina fuq Facebook