Dak li tajjeb għal pjazza Kastilja mhux tajjeb għal-pjazza tat-Tokk f'Għawdex
Il-Kunsill tar-Rabat Għawdex jisħaq fuq l-ipokrezija ta' Astrid Vella li qegħda taqbel mal-proġett ta’ Pjazza Kastilja dwar is-siġar rilokati
![](http://content.illum.com.mt/ui_frontend/thumbnail/684/0/malta-2011-20391_3.jpg)
Stqarrija li ħarġet miIl-Kunsill Lokali tal-Belt Victoria tgħid li ma jistax ma jinnotax it-trattament differenti li l-proġett ta’ Pjazza Kastilja fil-Belt Valletta ingħata in paragun ma dak ta’ Pjazza Indipendenza fil-Belt Victoria.
Il-Kunsill Lokali tal-Belt Victoria jinnota li din ser tkun it-tieni darba fi tlett snin li sejrin jinqalgħu siġar fi Pjazza Kastilja. Filwaqt li dan il-Kunsill mhux qed b’xi mod inaqqas mill-valur tal-proġett fi Pjazza Kastilja u mhux jesprimi opinjoni fuqu ma jistax ma jibqax sbalordit bit-trattament differenti - saħansitra diskriminatorju li għalih ġie soġġettat l-istess Kunsill mill-Awtorita tal-Ambjent u l- Ipjannar (MEPA).
L-istqarrija mill-kunsill tgħid li Il-Kunsill jinnota ukoll l-ipokrezija tal-moviment FAA u l-promotur tiegħu Astrid Vella li qegħda taqbel mal-proġett ta’ Pjazza Kastilja u tant qajmet battibekki u saħansitra allegat li konsegwenza tar-rilokazzjoni tas-siġar fil-Belt Victoria sejrin imutu n-nies.
Ittemm tgħid li bid-deċiżjoni tal-MEPA sejrin jintilfu €127,000 f’fondi għall-iskavar tal-arkeoloġija fi Pjazza Indipendenza. Il-Kunsill jinsab diżguzat bl-atteġġjament ta’ kull min kien involut bid-deċiżjoni marbuta ma’ Pjazza Indipendenza (Victoria) u jitlob lil MEPA terfa r-responsabbilta ta’ għemilha u lil Gvern jinvestiga saritx pressjoni żejda minn terzi perzuni fuq uffiċjali tal-MEPA sabiex ir-rilokazzjoni tas-siġar fi Pjazza Indipendenza ma jsirx.!