L-Aġenzija tas-Servizzi Korrettivi ħallset "bi żball" l-ispejjeż tal-qorti u dawk legali tal-eks direttur Alex Dalli għal numru ta’ kawżi ta’ libelli li tilef kontra l-Illum u MaltaToday.
L-informazzjoni tressqet fil-parlament mill-Ministru għall-Intern Byron Camilleri, li kien mistoqsi mid-Deputat Nazzjonalista Mark Anthony Sammut jekk l-Aġenzija għas-Servizzi Korrettivi (CSA) jew il-gvern kienx ħallas għall-ispejjeż ta’ Dalli.
Iktar kmieni din is-sena, Dalli tilef numru ta’ kawżi ta’ libelli li kien ippreżenta fuq rapporti dwar it-trattament ħażin tal-ħabsin waqt il-mandat tiegħu fis-CSA.
Dalli kienet fetaħ kawża lill-MaltaToday u lill-gazzetta oħt Illum fuq żewġ stejjer: l-ewwel dwar l-użu ta’ siġġu ta’ trażżin biex jiġi umiljat priġunier partikolari, u t-tieni storja kienet dwar allegazzjonijiet li Dalli kien daħħal pistola f’ħalq priġunier għax ġab ruħu ħażin u heddu li jisparalu.
Il-ministeru qal li l-libelli huma ta’ natura personali, u għalhekk kwalunkwe spejjeż legali assoċjati għandhom jitħallsu mill-persuna li tkun parti fil-każ.
“Ninsab infurmat li xi spejjeż kienu tħallsu b’mod żbaljat mill-aġenzija, iżda minn dakinhar ġew rimborsati,” qal Camilleri lill-Kamra.
Sammut staqsa wkoll jekk Dalli tneħħix mill-kariga tiegħu bħala rappreżentant speċjali ta’ Malta fil-Libja. Din il-parti tal-mistoqsija baqgħet mingħajr tweġiba.
