L-Inizjattiva ‘One Belt One Road’, issa msejħa l-Inizjattiva ‘Belt and Road’ (BRI), hija impriża ambizzjuża iżda kontroversjali biex tagħti spinta lill-konnettività u lill-kummerċ madwar id-dinja bil-flus u l-għarfien Ċiniż fl-iżvilupp tal-infrastruttura.
Il-Ministeru għall-Affarijiet Barranin qal li Malta tagħraf l-importanza taċ-Ċina bħala rwol globali, u għalhekk, bħal 17-il pajjiż Ewropew ieħor, Malta ffirmat memorandum ta’ ftehim (MoU) dwar l-Inizjattiva ‘One Belt One Road’.
Fl-2018, Malta kienet fost l-ewwel pajjiżi Ewropej li ffirmaw ftehim maċ-Ċina biex tissieħeb mal-pajjiż sabiex tiġi implimentata l-viżjoni tal-President tal-proġett ‘One Belt One Road’.
Skont il-ministeru, għalkemm Malta ffirmat, ma daħlet fl-ebda ftehim ieħor biex timplimenta proġetti taħt din l-inizjattiva.
Madankollu, Malta temmen li fil-qafas tal-politika tal-UE taċ-Ċina kif definita mill-'Elementi għal Strateġija ġdida tal-UE dwar iċ-Ċina' u l-'Konklużjonijiet tal-Kunsill Strateġija tal-UE dwar iċ-Ċina' li ġew riveduti fl-2019 fl-'EU-China Strategic Outlook' hemm lok għall-kollaborazzjoni taħt il-BRI f’numru ta’ oqsma saħaq il-ministeru.
Minn mindu tnediet din l-inizjattiva fl-2013 mill-mexxej taċ-Ċina Xi Jinping, il-BRI investiet biljuni ta’ dollari biex tibda l-kostruzzjoni ta’ pontijiet, portijet, toroq, impjanti tal-enerġija u anke proġett tat-telekomunikazzjoni madwar l-Asja, Amerika t’Isfel, l-Afrika u partijiet tal-Ewropa.
Il-President Ċiniż kien faħħar bħala l-“proġett tas-seklu”, li jissimbolizza ż-żieda fl-influwenza tal-pajjiż fuq livell globali.
Iżda dan intlaqa’ bi kritikazzjoni, hekk kif il-pajjiżi tal-Punent akkużaw li ċ-Ċina qiegħda tgħabbi pajjiżi li għadhom jiżviluppaw b’iktar dejn. Saru diversi protesti f’bosta pajjiżi kontra l-proġett dwar l-ispejjeż ambjentali u allegazzjonijiet ta’ korruzjoni fost oħrajn.
Kritiċi qalu li l-inizjattiva hija nassa ta’ dejn biex tikkontrolla l-infrastruttura lokali. Fl-2017, is-Sri Lanka ċediet il-kontroll fuq il-port ta’ Hambantota liċ-Ċina wara li naqset milli tħallas lura d-dejn tagħha.
Beijing jgħid li aktar minn 150 nazzjon iffirmaw ftehimiet ta’ kooperazzjoni fuq 3,000 proġett u investiment immobilizzat sa triljun dollaru.
Iċ-Ċina ospitat summit li jimmarka l-10 anniversarju tal-BRI il-ġimgħa li għaddiet f'Beijing bil-mexxejja dinjija, inkluż Vladimir Putin tar-Russja.
Matul ix-xhur li għaddew, l-Italja u l-Prim Ministru tagħha Giorgia Meloni għamluha ċara, permezz ta’ kummenti pubbliċi, li l-pajjiż irid jirtira mill-BRI. Hija saħqet li l-Italja se tikkanċella l-memorandum ta’ ftehim li kien iffirmat fl-2019 mill-gvern preċedenti mmexxi minn Giuseppe Conte.
L-Italja hija l-uniku nazzjon G-7 li approva uffiċjalment l-inizjattiva tal-politika barranija tal-President Ċiniż Xi Jinping.
Leġiżlaturi Taljani qalu li l-wegħda ta’ kummerċ bilaterali akbar u opportunitajiet ta’ negozju għall-pajjiż ma seħħitx.
