Il-pożizzjoni li ħadet il-Knisja Kattolika dwar it-terapija ta’ konverżjoni u li kienet ippublikata ilbieraħ permezz ta’ position paper, hija “mibnija fuq il-premessa li t-terapija ta’ konverżjoni tista’ taħdem u li persuna tista’ verament issir gay jew straight wara sessjonijiet għand psikologu. Agħar minn hekk, il-position paper lanqas biss tħares jew tipprova tħares lejn ir-riperkussjonijiet li batew nies bħali li għaddejna minn din it-trawma kerha. Diżappuntat bil-kbir u mweġġa’ mill-ġdid.”
Hekk sostna mal-ILLUM persuna li ftit snin ilu kellu jgħaddi mill-esperjenza “kerha” li jattendi sessjonijiet għand psikologu f’pajjiżna biex “ibiddel” is-sesswalità tiegħu.
“Pastażata,” qalilna dan l-istess persuna meta ddeskriva l-fatt li fir-rapport, il-Knisja Kattolika, “qed tagħmel il-punt tagħha kontra l-abbozz billi żżeffen fin-nofs it-terapija lill-pedofeli. Il-pedofelija u l-omosesswalità qatt m’għandhom jitpoġġew fuq l-istess livell u sa fejn naf jien, din il-liġi bl-ebda mod mhu qed twaqqaf terapija lill-pedofeli.”
Il-persuna li kellmitna, bil-kundizzjoni ta’ anonimità, l-aktar minħabba l-uġigħ emozzjonali li l-proċess ta’ terapija ta’ konverżjoni ġab miegħu qalilna rrabjat, li “li tuża l-pedofelija biex b’mod, anke jekk sottili, tiġġieled abbozz ta’ liġi li qed jagħmel kriminali dak li tant weġġa’ nies, huwa inkredibbli. Pastażata ta’ vera.”
Fil-fatt, id-dokument iwissi li jekk l-abbozz isir liġi, ma jkunx possibbli li jkunu assistiti pedofeli, anke jekk fl-istess opinjoni l-Knisja tfakkar li l-abbozz jitratta, “r-ripress jew eliminazzjoni tal-orjentazzjoni sesswali ta’ persuna, l-identità tal-ġeneru jew tal-espressjoni tal-ġeneru.” Fl-abbozz ippreżentat mill-Gvern, il-pedofeli ma jissemmew imkien.
